Ижтимоий-маданий масалалар / Меҳнат. Аҳолининг бандлиги

3-§. Касб стандарти мазмуни (макети)
146. Касб стандарти мазмуни (макети) ушбу Низомга 11-иловада акс эттирилган тўрт бўлимдан иборат:
Биринчи бўлим қуйидагиларни ўз ичига олади:
касб стандарти реквизитлари — касб стандарти ким томонидан, қачон ва қайси норматив-ҳуқуқий ҳужжат асосида тасдиқланган;
касб стандарти номи — ишлаб чиқувчилар шакллантирган касбий гуруҳнинг номланишига мос ном. Касб стандарти номи Иқтисодий фаолият турлари умумдавлат таснифлагичида белгиланган иқтисодий фаолият турлари билан боғланган бўлиши керак;
глоссарий — ушбу касб стандартида фойдаланиладиган асосий тушунчалар рўйхати.
Иккинчи бўлим касб стандарти паспорти мазмунини ўз ичига олади:
касб стандарти номи — биринчи бўлимдан олинади;
касб стандарти рақами — касб стандарти тасдиқлангандан кейин Бандлик ва меҳнат муносабатлари вазирлиги томонидан берилади;
асосий гуруҳ номи — асосий гуруҳнинг Машғулотлар миллий стандарт таснифлагичига мувофиқ кўрсатилади;
касб стандартининг қисқача баёни — касб кичик гуруҳининг Ўзбекистон Республикаси Машғулотлар миллий стандарт таснифлагичи бўйича тавсифи.
Учинчи бўлим харитани — ишчилар касблари ва хизматчилар лавозимлари баёнини ўз ичига олади. Ҳар бир касб (лавозим) бўйича қуйидагилар кўрсатилади:
касб (лавозим)нинг Хизматчиларнинг асосий лавозимлари ва ишчи касблари классификаторига мос номи;
касб (лавозим)нинг Ўзбекистон Республикаси Машғулотлар миллий стандарт таснифлагичи бўйича коди;
малака даражаси — Миллий малакалар рамкасига мувофиқ;
меҳнат функциялари номи ва коди — ходимнинг касб (лавозим) бўйича бажарадиган ишлари кўрсатилади. Меҳнат функцияси коди вазирлик томонидан белгиланадиган кодлагич бўйича аниқланади;
маҳорат ва кўникмалар — ходимларнинг муайян касб (лавозим) бўйича ҳар бир меҳнат функцияси бўйича нималарни бажара олишлари кераклиги баёнини ўз ичига олади;
билимлар — ҳар бир меҳнат функцияси бўйича ходим меҳнат функциясини муваффақиятли бажариши учун нималарни билиш кераклигининг баёнини ўз ичига олади;
шахс компетенцияларига талаблар — ходим тегишли меҳнат функциясини бажариш учун эга бўлиши зарур бўлган шахс хусусиятларининг баёнидан иборат;
бошқа касблар билан алоқадорлик — Миллий малакалар рамкаси доирасида ривожланиши давомида ходим эгаллаши мумкин бўлган бошқа касблар (мутахассисликлар) номларини ўз ичига олади.
Тўртинчи бўлим касб стандартининг техник маълумотларидан иборат бўлиб, қуйидагиларни ўз ичига олади:
касб стандартини ишлаб чиқувчи(лар)нинг номи - касб стандартини ишлаб чиқувчилари бўлган ташкилотлар ҳам, жисмоний шахслар ҳам кўрсатилиши мумкин;
касб стандартининг амал қилиш муддати — касб стандартини қайта кўриб чиқиш ва, зарур бўлганда, янгилаш вақт оралиғи.
147. Касб стандарти қуйидаги қоидаларга мувофиқ расмийлаштирилади:
Матн А4 форматдаги қоғозда ифодаланади;
варақ ўлчамлари — китоб ориентацияси бўйича қуйидаги ўлчамлардаги кенгликда: ўнг томони — 20 мм, чап томони — 25 мм, юқори ва пастки кенглиги — 20 мм;
ёзув: Times New Roman, 13-кегель, қатор оралиғи — 1,2 кўпайтиргичли;
барча бандлар ва кичик бандлар, шунингдек, варақлар (титул варағидан ташқари) араб рақамлари билан рақамланади. Бет рақами юқоридан бетнинг маркази бўйича қўйилади;
касб стандартлари номи ва унинг бўлимлари ёзуви қалинлаштириб белгиланади.