Ii группа металларының координационлы бирикпелери

Tetraamin mıs (II)gidroksid
[Cu(NH₃)₄](OH)₂

Taza mıs sım kolbag’a jaylastırıladı h’a’m ammiaktın’ kontsentrlengen eritpesi quyıladı. Eritpe arqalı birneshe saat dawamında SO₂ dep tazartılg’an h’awa jiberiledi. Alıng’an qaraltım ko’gis ren’li eritpe ashıq jolında forforlı ıdıspa parlandırıladı, keyin kolbag’a quyıladı h’a’m kolbag’a ammiaktın’ ku’shsiz ag’ımın o’tkeriw arqalı 60-70⁰S ta puwlandırıladı. Sho’kpege tu’sken kristllar filtrli qag’az ortasında qurg’atıladı. O’nimdi jabıq ampulada saqlaw kerek.

Tetraamin mıs (II) sulfat
[Cu(NH₃)₄]SO₄ ∙ H₂O

Ammiaktın’ kontsentrlengen 15 ml eritpesine 10 ml suw qosıladı h’a’m onda 10 g poroshok h’alındag’ı mıs kuporosı eritiledi. Bunda bo’linip shıqqan kristallar filtrlenip alınadı, spirttin’ ammiaklı eritpesi, son’ spirttin’ efirlik aralaspası menen juwıladı h’a’m 50-60⁰S ta qurg’atıladı.

Qa’siyeti: suwda jaqsı eriytug’ın (21,5⁰S ta 100 g suwda 18,5 g) h’awada turaqlı qaraltım ko’gis kristallı poroshok 120⁰S qa shekem qızdırg’anda suw h’a’m ammiaktı ajıratıp shıg’arıw arqalı tarqaladı.


Koordinatsiya orayı sıpatında anionlı gu’mis birikpelerinin’ sintezi.
[Ag₂X]NO₃
(bunda X-Cl^-, Br^-, I^-­). Gu’mis galogenidleri (AgCl, Br, AgI) toyıng’ang’a shekem AgNO₃ tin’ ıssı kontsentrlengen eritpelerinde eritiledi. Qattı faza ajıratılıp alıng’annan keyin eritpe suwıtıladı. Suwıtılg’anda aq, belgili da’rejede turaqlı birikpe [Ag₂X]NO₃ alınadı.
Qa’siyeti: suwda eritkenimizde gu’mis galogenidin payda etip tarqaladı.
[Ag₃I] (NO₃)₂
Xana temperaturasında AgI toyıng’ang’a shekem kontsentrlengen suwlı eritpesinde eritiledi. A’stelik penen eritpege u’sh ese ko’birek mug’dardag’ı suw qosıladı. Eritpeni bir neshe ku’n uslap turıw na’tiyjesinde 1-3 mm uzınlıqtag’ı kristallar ajıralıp shıg’adı.
Qa’siyeti: balqıw temperaturası 119,1⁰S qa ten’ bolg’an turaqlı aq kristallar, suw menen tarqaladı, 20⁰S g’ı d=5,042 ge ten’.