|
Ikkinchi navbatda, madaniy turizmning rivojlanishi uchun (boshqa turizm turlari singari) jozibador resurslar mavjud bo’lishining o’zi etarli emas. Ya’ni bundan tashqari, maxalliy turistik infratuzilma ham etarli darajada rivojlangan bo’lishi lozim. Respublikamizda turizm infratuzilmasini rivojlantirish maqsadida " O’zbekiston havo yo’llari" Milliy Aviakompaniyasi Markaziy Osiyodagi eng yaxshi aviatashuvchi tashkilotga aylantirildi. Toshkent-Buxoro temir yo’l yo’nalishining xizmat darajasi ko’tarildi. Toshkent-Samarqand yo’nalishida shinam tezyurar poezd qatnovi ishga tushirildi. Toshkent-Samarqand temir yo’li butunlay elektrlashtirilib " Afrosiyob" poezdi qatnovi amalga oshirildi.
Shuningdek, Toshkent, Samarqand, Xorazm kabi viloyatlarda ko’plab yangi zamonaviy mehmonxonalar qurib ishga tushirildi va qurilmoqda, ko’pgina aeroportlar zamonaviylashtirildi. Bundan tashqari Samarqand viloyatidan Surxondaryogacha bo’lgan temir yo’l tarmog’i elektrlashtirildi, Toshkent viloyatidan Qamchibek dovoni orqali Farg’ona vodiysiga o’tuvchi temir yo’l qurilishi nihoyasiga etkazilishi orqali vodiyning turistik imkoniyati oshib bormoqda.
XULOSA VA TAKLIFLAR
O’zbekiston madaniy turistik mahsulotni halqaro va ichki turistik bozorda o’tkazish bo’yicha aniq maqsadga qaratilgan to’g’ri marketing siyosatini yurita oladigan mutaxassis kadrlarni tayyorlash zarur.Chunki qo’shni mamlakatlardan ko’rsatilayotgan kuchli raqobat sharoitida uzoqlardan keluvchi turistlarni turistik manzilgohlarimizga jalb qilish uchun bizning turmahsulotimiz bilan qiziqadigan iste’molchilarni topish, ularni o’lkamizda aynan nimalar qiziqtirishi va bu qiziqishni qanday usullarda qondirish lozimligini aniqlash, hamda shunga mos tadbirlarni amalga oshirish faqatgina turizm sohasidan xabardor bo’lgan etuk marketing mutaxassisiningina qo’lidan kelishi mumkin.
Xulosa qilib aytganda, madaniy turizm mamlakatimiz uchun istiqbolli sanalgan turizm turlaridan biridir. Shu sababli, uni rivojlantirish borasida izchil siyosat yuritilmoqda, turizm sohasini rivojlantiruvchi tadbirlar qo’llab-quvvatlanmoqda. Oqilona yuritilayotgan turistik siyosatni o’lkamizda yangi yaratilayotgan turistik tashkilotlarning soni kun sayin oshib borishidan ham ko’rsak bo’ladi.
Turizmni rivojlantirishda e’tiborga olinishi lozim bo’lgan yana bir jihat — turistik resurslardan kelgusi avlod ham manfaat olishi uchun ularni asrab- avaylash va saqlab qolish masalasi o’zining dolzarbligi bilan ajralib turadi. Shuni inobatga olgan holda mamlakatimizda qurilayotgan har bir yangi bino qurilish uslubi, dizayni chet eldan kelayotgan sayohlarni o’ziga tortadigan bo’lishi lozim. Bu borada mamlakatimizda qad ko’tarayotgan binolarning arxitektura loyihalarining ishlab chiqilayotganligi quvonarli holdir. Shu bilan birga qayta ta’mirlangan mashhur ziyoratgohlarimizda milliy qurilish san’ati an’analariga sodiq qolinmoqda. Birgina " Zangiota" ziyoratgohida amalga oshirilgan ishlar namuna sifatida ko’rsatilishi mumkin. Endigi masala xususiy sektor tomonidan tarixiy maskanlarimizda qurilayotgan yangi binolarda ham shu muhit usulidan keskin farqlanishning oldini olishdan iboratdir.
Shuningdek, mamlakatimizda tarixiy binolar ta’mirlanayotganda uning asl ko’rinishini saqlab qolish muhimdir. Bunda qayta ta’mirlash bahonasida binoning tashqi bezaklarini butunlay ko’chirib, bu bezaklarni yangi qurilish materiallari bilan qaytadan yaratish binoning tarixiy qadrini tushirib yuborishi mumkin. Chunki, madaniy turizm ixlosmandlarini aynan madaniy turistlarni eski usulda qurilgan yangi bino emas, aynan eski binoning o’zi ko’proq qiziqtiradi. Shu sababli,ta’mirlash ishlarini amalga oshirganda, bu kabi xatolarga yo’l qo’yilishining oldini olish maqsadga muvofiq deb hisoblaymiz.
Turistlarni jalb etuvchi tabiiy boyliklarimizni saqlab qolish ham muhim masaladir. Yurtimizda bu boradagi ishlar davlat siyosati darajasida hal etilayotganligi tahsinga sazovordir.
Shu bilan birga, mamlakatimizning betakror tabiati, go’zal dam olish zonalari imkoniyatlaridan foydalanib, yangi turistik yo’nalishlar ochish mumkin. Bu sohaga jahon brendlarini faol jalb etgan xolda biz ziyorat turizmi, ekologik, ma’rifiy, etnografik, gastronomik turizm va bu sohaning boshqa tarmoqlarini rivojanlantirishga alohida e’tibor qaratishimiz zarur. Bu borada davlat-xususiy sherikchilik munosabatlarini qo’llash sohani taraqqiy ettirishda keng imkoniyatlar ochishni hisobga olishimiz lozim.Samarqand, Buxoro, Toshkent shaharlaridagi muqaddas qadamjolar va yodgorliklarni ziyorat qilishdan iborat bo’lgan «kichik xaj» dasturi doirasida ichki turizm sohasidagi katta imkoniyatlarni ham to’liq ishga solishish zarur deb hisoblaymiz.
Yuqoridagilardan ko’rinib turibdiki, O’zbekistonda madaniy turizmni yanada rivojantirish imkoniyatlari mavjud bo’lib, uning rivojlanishi O’zbekistonning halqaro aloqalari rivojlanishiga o’z hissasini qo’shadi. Xalqaro aloqalarning rivojlanishi xalqimizni boshqa millatlar bilan yanada yaqinlashtiradi, bu esa, o’zaro hamkorlikni kuchaytiradi.O’zaro hamkorlikning kuchayishi O’zbekistonga kirib kelayotgan xorijiy investitsiyalarning yanada o’sishiga olib kelishi shak- shubhasizdir.
Do'stlaringiz bilan baham: |
