I «buxgalteriya hisobi» kafedrasi “buxgalteriya hisobi ” fani

8. Товар-моддий захираларни ҳисобга олишнинг тизимлари

1. Товар-моддий захираларни узлуксиз (доимий) ҳисобга олиш.

Товар-моддий захираларни узлуксиз ҳисобга олиш тизимидан фойдаланилганда товар-моддий захираларни ҳисобга олиш счётларида уларнинг келиб тушиши ва чиқиб кетиши бўйича операциялар батафсил акс эттириб борилади. Натижада бутун ҳисобот даври мобайнида қуйидагилар аниқ бўлади: маълум бир товар-моддий захираларнинг мавжудлиги ва сотилган захираларнинг таннархи. Сотилган товар-моддий захираларнинг таннархи, сотишнинг боришига қараб «Сотилган маҳсулот таннархи» счётида акс эттирилади.

2. Товар-моддий захираларни даврий ҳисобга олиш.

Даврий ҳисобга олиш тизими қўлланилганида йил давомида товар-моддий захираларни батафсил ҳисоби юритилмайди. Товар-моддий захираларнинг ҳақиқатдаги мавжудлиги уларни инвентаризация натижалари бўйича аниқланади. Сотилган товар-моддий захираларнинг таннархи уларни инвентаризацияси якунланишига қадар аниқланиши мумкин эмас, чунки сотилган товар-моддий захираларнинг таннархини ҳисоб-китоб қилиш қуйидаги формула билан амалга оширилади:

Ҳисобот даври бошига товар-моддий захираларнинг қолдиғи

+

Товар-моддий захираларнинг келиб тушиши

=

Сотиш учун тайёр товар-моддий захираларнинг таннархи

—

Ҳисобот даври охирига товар-моддий захираларнинг қолдиғи

=

Сотилган товар-моддий захираларнинг таннархи

Даврий ҳисобга олиш тизими қўлланилганида товар-моддий захираларни ҳисобга олувчи баланс счётларидаги қолдиқ инвентаризация тугагунга қадар бошланғич даражада ўзгармай туради.

Товар-моддий захираларни даврий ҳисобга олиш усулидан фойдаланилганда ҳар бир маҳсулот (товар)нинг таннархи ҳисобот даври давомида вақтинчалик 9140 “Даврий ҳисобда ТМЗ сотиб олиш / харид қилиш” счётида йиғилади, бироқ сотилган маҳсулотлар, товарларнинг ҳақиқий таннархини фақат ТМЗ инвентаризация қилингандан сўнг аниқлаш мумкин. 9150 “Даврий ҳисобда ТМЗ бўйича тузатишлар” счёти - ҳисобот даврининг охирида инвентаризация натижасида ТМЗни мавжудлигини акс эттириш учун фойдаланиладиган вақтинчалик счёт. Кўрсатилган счётнинг дебети бўйича ТМЗнинг камайиши, кредити бўйича ТМЗнинг ўсиши ТМЗни ҳисобга олувчи счётлар (1000-2900) билан боғланган ҳолда акс эттирилади.