I bob. Nazariy qism 3 Axborot texnologiyasining rivojlanish tarixi 13

4 – bosqich. XX asrning oʻrtalariga toʻgʻri kelib, «elektron» texnologiyalar qoʻllanilishi bilan belgilanadi. Bu texnologiyaning asosiy vositasi EXM lar va ularning asosida tashkil etiladigan avtomatlashtirilgan boshqarish tizimlari va axborot izlash tizimlaridir.
5 – bosqich. XX asrning oxiriga toʻgʻri keladi. Bu bosqichda kompyuter texnologiyalari taraqqiy etdi. Ularning asosiy vositasi turli maqsadlarga moʻljallangan turli dasturiy vositalarga ega boʻlgan shaxsiy kompyuterlardir. Bu bosqichda kundalik turmush, madaniyat va boshqa sohalarga moʻljallangan texnik vositalarning oʻzgarishi roʻy berdi. Lokal va global kompyuter tarmoqlari ishlatila boshlandi.
Oʻzbekiston Respublikasi Prezidenti Shavkat Mirziyoyev 2020-yil 13-fevral kuni axborot texnologiyalarini rivojlantirish, buning uchun zamonaviy infratuzilma yaratish masalasi boʻyicha yigʻilish oʻtkazdi.
Ma’lumki, 2020-yil Oʻzbekistonda “Ilm, ma’rifat va raqamli iqtisodiyotni rivojlantirish yili”, deb e’lon qilindi. Barcha sohalarda ochiq-oshkoralik va samaradorlikni ta’minlash maqsadida “Elektron hukumat” tizimi keng joriy etilmoqda. Xususan, Yagona interaktiv davlat xizmatlari portali orqali 178 ta xizmat yoʻlga qoʻyilib, aholining vaqti va xarajatlari tejalmoqda.
Raqamli iqtisodiyotning yalpi ichki mahsulotdagi ulushi AQSHda 10,9 foiz, Xitoyda 10 foiz, Hindistonda 5,5 foizni tashkil etadi. Oʻzbekistonda bu koʻrsatkich 2 foizdan ham oshmaydi.
Bu sohani rivojlantirish va eksport salohiyatini oshirish maqsadida Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan Hindiston Respublikasining Elektronika va axborot texnologiyalari vazirligi qoshidagi Dasturiy texnologiyalar parklari jamiyati hamkorligida mamlakatda IT-park tashkil etilishi belgilangan edi. 2019-yil 10-yanvarda Vazirlar Mahkamasining shu boradagi qarori qabul qilinib, poytaxtning Mirzo Ulugʻbek tumanida Dasturiy mahsulotlar va axborot texnologiyalari texnologik parki qurila boshlandi.