Hozirgi o‘zbek hikoyachiligida davr va inson talqini

Magistrantning tadqiqotiga qisqacha fikr-mulohazalar
Magistrlik tadqiqotining “Hozirgi o‘zbek hikoyachiligida davr va inson talqini” deb nomlangan birinchi bobida badiiy obraz, xarakter, tip atamalariga atroflicha fikr bildirilib, bu istilohlar hozirgi o‘zbek hikoyanavistlari asarlari misolida o‘rganilgan. Kirish, dastlabki bob, xulosa va adabiyotlar ro‘yhatini ko‘zdan kechirib, quyidagi amaliy tavsiyalarni bayon etamiz:
1. Epik turga oid biror mavzu yoritilgan magistrlik yoki PhD dissertatsiyasini topib, sinchiklab o‘rganib chiqing. Avvalo, magistrlik ishining shakl-shamoillarini qunt bilan o‘rganing.
2. Iqtibos keltirishdagi xotoliklarni tuzating, foydalanilgan ilmiy yoki badiiy manbaning krill va lotin alifbosida yozilganligini farqlang.
3. Asosan obraz va timsol haqida fikr bayon qilib, davr ruhi ifodalanishini nazardan qoldirgansiz.
4. Hikoyalarda davr ruhi va inson talqini kimning qaysi asarlarida yorqinroq aks ettirilganligiga urg‘u bering.
5.Ilmiy matn tuzishda so‘zlashuv uslubidagi “naqadar original-a? alqab turgan samimiyatdan uzilib qoladi” kabi jumla va lisoniy qurilmalardan foydalanmang. Ilmiy akademik uslubda fikr bayon qilishni o‘rganing.
6. Mustaqil fikrlaringizni muayyan hikoyalardan olingan badiiy iqtiboslar bilan dalillang. Tadqiqotingizda badiiy matnlardan kam foydalangansiz.
7.An’anaviy va noan’anaviy sujet va uslubdagi hikoyalar, mistik va istioraviy hikoyalar kabi bandlarda hikoyalar shunchaki shoda-shoda qilib sanalmasdan ularning biri muayyan darajada tahlilga tortilsa, ayni muddao bo‘lardi.
8.Sobir O‘narning “Tarvuz” hikoyasi tahlilida mavzudan chetlashish kuzatiladi. O‘zbek hikoyachiligidagi davr va inson talqini borasida fikr bildirilmagan.
9.”O‘zbek adabiyotida hikoya janri va obraz tahlili” deb nomlangan faslda o‘zbek hikoyachiligi va uning tarixi haqida mutlaqo fikr yuritilmagan.
10. Orfografik, punktuatsion va stilistik xatolarni bartaraf eting.