Veterinariya va zooinjeneriya fakulteti veterinariya kafedrasi

Davolash. Dirofilyariozni davolash invaziyaning intensivligiga qarab kompleks ravishda olib borilishi kerak. Davolashni boshlashdan oldin itni egasidan yozma ruxsat olish kerak, chunki davolash jarayonida hayvonning ahvoli yomonlashib o‘lishi ham mumkin. Bundan tashqari davolashdan oldin itning qoni klinik va bioximik tekshiriladi va hayotiy muhim organ va sistemalarning faoliyati ham tekshirishdan o‘tkaziladi.

Davolash bir necha bosqichda olib boriladi.

Birinchidan hayvon parazitga qarshi terapiyaga tayyorlanadi, buning uchun qon quyuqlashmasligi uchun aspirin, 0,5 mg/kg, geparin, antigistamin preparati dimedrol 1 mg/kg, yurak uchun kofein 0,5-1 ml, kardiamin 0,5 ml/10 kg, gepatoprotektorlardan karsil 2 tabletka 3 mahal, essel forte 1 kapsula 2 mahal, galstena 3-5 tomchi qo‘llaniladi. SHishlar hosil bo‘lgan bo‘lsa siydik so‘ruvchi laziks, furasemid 2-5 mg/kg beriladi.

Voyaga etgan dirofilyariyalarga qarshi oxirgi yillarda melarsomina digidroxlorid qo‘llaniladi, preparat 3-5 chi bel umurtqalari orasidagi mushaklarga, miqdori 2,5 mg/kg ikki marta har 24 soatda yuboriladi. In’eksiya qilingan joyda og‘riydigan shish hosil bo‘ladi, u 2 haftada so‘riladi. Bu terapiyani jiddiy asorati o‘pka tromboemboliyasi davolashning 10-21 kunida rivojlanadi. Buning oldini olish uchun tinch sharoit yaratish kerak.

Mikrofilyaritsid terapiyani 3-4 haftadan keyin qo‘llash mumkin, buning uchun ivermektin teri ostiga yuboriladi, 1 ml 50 kg t.v, brovermektin 0,2-0,4/10 kg t.v., bundan tashqari milbemitsin oksim, moksidektin qo‘llash mumkin. Dironet preparati 1 tabletka 10 kg t.v., suspenziyasi 1 ml/kg.

Oldini olish. Dirofilyariozning oldini olish maqsadida chivinlar paydo bo‘lishdan oldin ivermektin preparati yuboriladi, keyin har oyda 1 marta, oxirgisi noyabr oyida beriladi. SHu maqsadda dironet preparatini qo‘llash ham mumkin, chivinlarni uchishdan oldin, keyin har oydaa va oxirgisi noyabr oyida beriladi.