Ўқув модули бирликлари

Алюминий фольга (альфоль)- гофрларининг чўққиларида алюминий фольга елимланган гофрланган қоғоз лентадан иборат янги иссиқлик изоляцияси материали. Иссиқлик изоляцияси материалининг айни тури исталган ғовак материалдан фарқли ўлароқ, алюминий листлар орасидаги ҳавонинг паст иссиқлик ўтказувчанлигини алюминий фольга юзасининг ўзининг юқори даражада қайтариш қобилиятини уйғунлаштиради. Иссиқликдан изоляциялаш мақсадлари учун алюминий фольга эни 100 мм гача, қалинлиги 0,005-0,03 мм бўлган ўрамларда чиқарилади.
Иссиқлик изоляциясида алюминий фольгадан фойдаланиш тажрибаси шуни кўрсатадики, фольга қатламлари орасида ҳаво қатламининг қалинлиги 8-10 мм, қатламлар сони камида учта бўлиши керак. Алюминий фольгадан тайёрланган бундай қатлам-қатлам қурилманинг зичлиги 6-9 кг/м³, иссиқлик ўтказувчанлиги 0,03-0,08 Вт/(м·⁰С).
Алюминий фольга бинолар ва иншоотларнинг иссиқлик изоляцион қатламли қурилмаларида қайтарувчи изоляция сифатида, шунингдек, ҳарорати 300⁰С бўлган саноат асбоб-ускуналари ва қувурларни иссиқлик изоляцияси учун ишлатилади.

4 -§. Акустик материаллар

Турли мақсадларга мўлжалланган биноларни қуришда уларнинг акустикасига (тинчлик, осойишталик ва эшитиш учун маълум шароитларни таъминлаш) боғлиқ бўлган масаларни ҳал этишга тўғри келади. Бу масалаларнинг ҳал этилиши акустик материалларни тўғри танлашга боғлиқ. Вазифасига қараб акустик материаллар товуш изоляциялайдиган-қистирма ва товуш ютувчи материалларга бўлинади.

Товуш ютувчи материаллардан саноат цехларида, идора ва бошқа хоналарда шовқин даражасини пасайтириш учун, томоша заллари, аудиторияларда яхши акустик шароитлар яратиш ва теле ҳамда радиостудия хоналарида махсус акустик шароитлар яратиш вентиляцион мосламалар, лифтлар, юк кўтаргичлар ва ҳоказоларнинг шовқин сўндиргичларида товуш ютувчи қопламалар яратиш учун фойдаланилади.
Товуш ютувчи материаллар товуш ютиши бўйича қаттиқ асосли серковак ва – эластик, мембран ҳамда перфорацияланган материалларга бўлинади. Қаттиқ асосли товуш ютадиган серковак материаллар - ғовак бетонлар, кўпик шиша ва бошқалар. Улардан тайёрланган буюмлар (плиталар) паррон ковакли ғовак тузилишга эга. Уларнинг ўзига хос фарқловчи хусусиятлари- енгиллиги, мустаҳкамлиги ва юқори даражада олов бардошлиги. Серковак-эластик товуш ютувчи материаллар – минерал пахта, шиша пахта, ёғоч толали изоляцион плиталар, кўпикпластлар ва бошқалар. мембран товуш ютувчи материаллар жумласига фанердан қилинган юпқа панеллар, ёғоч толали бикр плиталар, зич картон, товуш ўтмайдиган матолар киради.

89-расм. Акмигран плиталар	90-расм Ёғоч толали акустик плиталар

Толали акустик плиталар минерал пахта, шиша ёки асбест толасидан фенолформальдегид, битум ёки крахмал боғловчи асосида тайёрланади. Бу плиталар технологияси асосан иссиқлик изоляцион плиталарнинг олдин кўриб ўтилган технологиясига ўхшаш бўлиб, бундан юзага ишлов беришга оид қўшимча операциялар (шлифовка қилиш, бўяш, перфорациялаш ва шу кабилар) мустаснодир.

Товуш ютиш плиталари иссиқлик изоляция плиталаридан скелетининг анча бикрлиги, ковакларининг парронлиги ва ташқи безаги билан фарқланадилар. Кўпинча толали тайёр плиталарга декоратив фактура: тарновсимон, ғалвираксимон ёки серёриқ перфорацияланган, бўртма ва шунга ўхшаш кўринишли қилинади. Плиталарнинг юзаси махсус эмульсиялар ёки елим бўёқлар билан бўялади, бўяш пуркаб бажарилади. Плиталарнинг ўлчами 300х300 дан 900х1000 мм гача, қалинлиги 15-100 мм . Минерал пахта ва шиша пахта плиталарнинг зичлиги 50-250 кг/м³, юқори ва ўртача частоталарда товуш ютиш коэффиценти 0,5-0,8. Акустик плиталарнинг айни турида перфорация қилинмайди, улар жамоат учун мўлжалланган биноларни қоплаш учун қулай бўлади ва саноат бинолари учун яроқсиздир, чунки уларни ифлосликлардан тозалаш қийин.
Акминит ва акмигран плиталар (89-расм) крахмал боғловчи асосида асосида минерал ёки шиша пахта доналаридан тайёрланадиган товуш ютадиган пардозлаш материали ҳисобланади. Плиталар ишалб чиқариш технологик жараёни минерал пахтани юмшатиш ва грануллаш, олинган гранулларни крахмал боғловчи эритмаси билан аралаштириш, қолиплаш, қуритиш ва механик усулида ишлаш жилвирлаш, четлаш),шунингдек, кейинчалик бўяш ва упаковка қилишдан иборат. Плиталар 300х300х20 мм ўлчамли қилиб чиқарилади. Уларнинг зичлиги 320-360 кг/м³, товуш ютиш коэффициенти 0,2-0,8. Плиталарнинг ўнг томони (бўялган) нуралган оҳактошга ўхшатиб ишланган йўналтирилган дарзлар кўринишидаги дарзларга эга.
Акминит ва акмигран плиталар нисбий намлиги 70-80% бўлган жамоат бинолари ички хоналари шип ва деворларининг товуш ютувчи декоратив қопламалари учун мўлжалланади. Плиталар уларнинг тез тикланишини таъминлайдиган металл профиллар системаси ёрдамида маҳкамланади. бу юқори сифатли декоратив акустик материал билан концерт ва томоша заллари, кинотеатрлар ва хоказолар пардозланади.
Товуш ютишини кучайтириш учун ёғоч толали плиталарда уларнинг қалинлигининг ¹/₂ -²/₃ гача чуқурликда ариқчалар очилади ёхуд перфорацияланади, бу эса плиталарга чиройли ташқи кўриниш беради 90-расм). Плиталарнинг сирти елим ёки синтетик бўёқни пуркаб бўялади. Плиталар ўлчами 1200х1200 дан 3000х1700 мм гача қалинлиги 2-25 мм қилиб чиқарилади. Плиталарнинг зичлиги 200-250 кг/м³, товушни 200 дан
2000 Гц гача тебраниш частоталари диапазонида товуш ютиш коэффиценти камида 0,3-0,4.