Nodavlat maktabgacha ta’lim muassasasini O'zbekiston Respublikasi Xalq ta’limi vazirligi bilan kelishgan holda muassis tomonidan tayinlanadigan shaxs boshqaradi.
Nodavlat maktabgacha ta’lim muassasasi rahbari davlat maktabgacha ta’lim muassasasi mudiri lavozimiga qo'yiladigan malaka talablariga muvofiq bo'lishi kerak.
Nodavlat maktabgacha ta’lim muassasasi faoliyatini nazorat qilish muassis tomonidan, shuningdek vakolatlar doirasida qonun hujjatlarida belgilangan tartibda vakolatli davlat organlari tomonidan amalga oshiriladi.
Maktabgacha ta’limga qo'yiladigan davlat talablari va o'qitish dasturlarining nodavlat maktabgacha ta’lim muassasalari tomonidan bajarilishini nazorat qilishni O'zbekiston Respublikasi Xalq ta’limi vazirligi amalga oshiradi.
Nodavlat maktabgacha ta’lim muassasalarini attestatsiyadan o'tkazish, ularning faoliyatini to'xtatib turish va to'xtatish qonun hujjatlarida belgilangan tartibda amalga oshiriladi.
NODAVLAT MAKTABGACHA TA’LIM MUASSASASINING MOL-MULKI VA PUL MABLAG'LARI
Muassis yoki u vakolat bergan organ maktabgacha ta’lim muassasasiga mol- mulkni qonun hujjatlarida belgilangan tartibda birkitadi.
Maktabgacha ta’lim muassasasiga birkitilgan mol-mulk uning tezkor boshqaruv huquqida bo'ladi. Maktabgacha ta’lim muassasasi o'ziga birkitilgan mol-mulkni va o'ziga ajratilgan mablag'lar hisobiga sotib olingan mol-mulkni qonun hujjatlariga muvofiq tasarruf etadi.
Maktabgacha ta’lim muassasasi o'z majburiyatlari bo'yicha o'z tasarrufidagi pul mablag'lari bilan javob beradi.
Maktabgacha ta’lim muassasasi faoliyati uning muassisi tomonidan qonun hujjatlariga muvofiq moliyalashtiriladi.
Quyidagilar maktabgacha ta’lim muassasasi mol-mulkini va moliyaviy resurslarini shakllantirish manbalari hisoblanadi:
muassisning mablag'lari;
boshqa jismoniy va yuridik shaxslarning ixtiyoriy ehsonlari hamda maqsadli badallari;
qonun hujjatlarida taqiqlanmagan boshqa manbalar.
Nodavlat maktabgacha ta’lim muassasasini moddiy-texnik ta’minlash muassislar tomonidan davlat maktabgacha ta’lim muassasalari uchun O'zbekiston Respublikasida amal qiladigan normalardan past bo'lmagan miqdorlarda amalga oshiriladi.
Nodavlat maktabgacha ta’lim muassasasi shartnoma asosida boshqa ta’lim muassasalariga pulli xizmatlar ko'rsatishi, xonalarni va tegishli asbob-uskunalarni ijaraga berishi mumkin.
Nodavlat maktabgacha ta’lim muassasasida bolalarga ta’lim-tarbiya berilganligi uchun ota-onalar yoki ularning o'rnini bosuvchi shaxslarning to'lovi miqdori shartnomada belgilanadi va O'zbekiston Respublikasi qonun hujjatlarida belgilangan tartibda to'lanadi.