O’zbekiston respublikasi jismoniy tarbiya va sport vazirligi o’zbekiston davlat jismoniy tarbiya va sport universiteti eshkak eshish nazariyasi va uslubiyati chirchiq-2020 yil

30-mavzu. Har xil malakali eshkak eshuvchilar sport trenirovkasini tashkil qilish


Sport maktablari oldida turgan vazifalar. Sportchilarni tayyorlash maxsus sport maktablarida olib boriladi va ular qo’yidagilarga bo’linadi: bolalar va o’smirlar sport maktablari (BO’SM), ixtisoslashtirilgan bolalar va o’smirlar olimpiya zahiralari maktablari (IBO’OZM), oliy sport mahorati maktablari (OSMM), shuningdek sportga ixtisoslashgan maktab-internatlar (SIMI) hamda oliy o’quv yurtlari jismoniy tarbiya va sport kafedralari.
Sport maktablari ishi aniq muayyan vazifalarni amalga oshirishga yo’naltirilgan. BO’SM har tomonlama rivojlangan yuqori malakali sportchilarni tayyorlashni amalga oshirib, ularning sog’lig’i va har tomonlama jismoniy rivojlanishini ta`minlaydi; shug’ullanuvchiar orasidan jamoatchi-instruktorlar va hakamlar tayyorlash ishlarini olib boradi va umumta`lim maktablariga sinfdan tashqari ommaviy sport ishlarini tashkil qilishda yordam beradi. Bulardan tashqari, ixtisoslashgan bolalar va o’smirlar olimpiya zahiralari maktablari oldida yana bir masala turadi: respublika terma jamoalari safini to’ldirish. IBO’OZM uchun bu bosh vazifa hisoblanandi va uning butun faoliyatini aniqlab beradi.
OSMMning vazifalari quyidagilar hisoblanadi:
- sport ustalari, respublika terma jamoalariga nomzodlar, xalqaro toifadagi sport ustalarini tayyorlash;
- o’qituvchi-murabbiylar tarkibi ishi amaliyotiga sport mashg’ulotining ilg’or usullarini ishlab chiqish, takomillashtirish va joriy qilish.
- BO’SM, IBO’OZM, SIMI va boshqa sport tashkilotlarining o’quv-trenirovka ishlarida ketma-ketlikni amalga oshirish;
- shahar, viloyat, respublikada o’quv-trenirovka ishlariga uslubiy rahbarlik qilish.
Sportchilarning muntazam mashg’ulotlari ularda anchagina zahira vaqtlari bo’lishini talab qiladi. Bu muammolarni hal qilish maqsadida sportga ixtisoslashgan umumta`lim maktab-internatlari yaratilmoqda. SIMIning asosiy vazifasi-birgalikdagi yashash sharoitlarini hisobga olgan holda respublika terma jamoalari uchun yuqori malakali sportchilarni tayyorlash.