Нефть ва газни қайта ишлаш жараёнлари ва ускуналари Ўзбекистон Республикаси Олий ва ўрта махсус таълим вазирлиги олий ўқув юртлари бакалавриатининг «Нефть ва нефть-газни қайта ишлаш технологияси»

Сепаратор (лот.) – аралашмаларни ажратувчи ускуна; ишлаш принципи аралашма компонентлари физик хоссаларнинг турлича бўлишига асосланган.
Сепарация (лот.) – суюқ ёки қаттиқ заррачаларни газлардан, қаттиқ заррачаларни эса суюқликлардан ажратиш; қаттиқ ёки суюқ аралашмаларни таркибий қисмларга ажратиш.
Сопло (рус.) – ичида газ ёки суюқлик тезлиги ошадиган ўзгарувчан кесимли канал (қисқа қувур).
Сорбент (лот.) – газ, буғ ва эриган моддаларни ютадиган қаттиқ ва суюқ моддалар. Газ ва буғни бутун ҳажмича ютувчи суюқ сорбент абсорбент дейилади. Ютилаётган газ, буғ ёки эриган моддаларни юзасига тўплайдиган қаттиқ сорбент адсорбент деб аталади. Ион алмашинувчи смолалар (ионитлар) сорбентларнинг алоҳида гуруҳига мансуб.
Сорбция (лот.) – газ, буғ ёки эриган моддаларнинг қаттиқ жисм ёки суюқликда ютилиши. Сорбциянинг абсорбция, адсорбция, хемосорбция, ион алмашинувчи сорбция, капилляр конденсация турлари мавжуд. Сорбцион жараёнлар саноатда маҳсулотлар, газлар ва оқова сувларни тозалашда кенг қўлланилади.
Стандарт (инг.) – норма, андоза, намуна, ўлчам. Кенг маънода бошқа объект (маҳсулот)ларини таққослаш учун дастлабки объект деб қабул қилинган ўзига ўхшаш намуна, эталон, модель. Стандарт бажарилиши лозим бўлган бир қанча шартлардан иборат ҳужжат ҳолида, катталиклар бирликлари ёки физик константалар ҳолида ёки таққослаш учун бирон предмет ҳолида бўлиши мумкин.
Скруббер (инг.) – чангли газларни ювиш йўли билан тозалайдиган ускуна.
Суспензия (лот.) – суюқ дисперсион муҳитли ва зарралари броун ҳаракатига тўсқинлик қила оладиган даражада йирик бўлган дисперс фазали турли жинсли системалар.
Схема (юнон.) – асбоб, қурилма, ускуна, иншоот ва бошқаларнинг асосий ғоясини, иш принципларини ҳамда жараёнлар кетма-кетлигини изоҳлаб берадиган чизма.
Технология (юнон.) – ишлаб чиқариш жараёнида тайёр маҳсулотлар олиш учун ишлатиладиган хом ашё, материал ёки ярим фабрикатларнинг ҳолати, хоссаси ва шаклларини ўзгартириш, уларга ишлов бериш, тайёрлаш услублари мажмуи. Технологиянинг фан сифатидаги вазифаси – энг самарали ва тежамли ишлаб чиқариш жараёнларини аниқлаш ва амалда жорий қилиш мақсадида физикавий, кимёвий, механик ва бошқа қонуниятларни топиш.
Фильтр (франц.) – қаттиқ ва суюқ фазали ҳар хил жинсли системани ғовак тўсиқлардан ўтказиб таркибий қисмларга ажратадиган, қуюлтирадиган ёки тиндирадиган ускуна.