Mavzu. 1 Odam anatomiyasi va fiziologiyasi. Modda va energiya almashinuvi reja

ORGANLAR VA ORGANLAR TIZIMI

Organlar organizmning ma'lum shaklga, tuzilishga ega bo'lgan, o'ziga xos vazifani bajaradigan bir qismidir. Organlarning tarkibida ularni tashkil qilgan asosiy to'qimalardan tashqari, yana nerv, qon tomirlar va biriktiruvchi to'qimalar ham bor. Organlar organizmning evolyutsion rivojlanish jarayonida mavjud muhitga moslashgan holda saqlanishga, ko'payishga va hayot kechirishga moslashib rivojlanadi. Organlar organizmdan tashqari sharoitda hayot kechira olmaydi. Organlarning tuzilishi bilan funksiyalari bir-biriga chambarchas bog'liq bo'ladi. Shuning uchun ham organlarning tuzilishi, shaklining o'zgarishi ularning funksiyasiga va aksincha, funksiyalarning o'zgarishi organlarning hajm va tuzilishiga ta'sir etadi. Bundan tashqari, organlarning tuzilishi, shakli va vazni jinsga va yoshga ham bog'liq bo'ladi.