Maktabgacha ta’limda nutq madaniyati” fanidan o‘quv-uslubiy majmua

2-topshiriq. She’rni ifodali o’qing. She’r matndagi ko’chma ma’noli so’zlarni topib, ma’no ko’chish turini aniqlang.

TILLA BALIQCHA

Tuxumdan chiqdi-yu, keltirib uni

Shu loyqa hovuzga tomon otdilar.

Tashlandiq ushoq yeb o’tadi kuni,

Xor-u xas, xazonlar ustin yoptilar.

Dunyoda ko’rgani shu tor hovuzcha

Va mudroq tollarning achchiq xazoni.

Menga alam qilar, tilla baliqcha

Bir ko’lmak hovuz deb bilar dunyoni...

Abdulla Oripov

3-topshiriq. Matnni ifodali o’qing. Matnda qo’llangan badiiy tasviriy vositalarni toping.

“Buyuk xizmatlari uchun” ordenini qo’limga olib qarayman. “Buyuk” so’zini o’qiganimda yetmish yetti yillik g’uborlarim tarqab ketgandek bo’ldi. Ko’rgan jabr-u jafolar tumandek g’oyib bo’ldi. Jez konlari tagida mis kukunlarini yutib, o’pkasi zanglab olamdan o’tgan, jasadlari zanglagan tuproqqa qo’yilgan yurt- doshlarim haqqi, Sibirning qahraton sovuqlarida muzlab qolgan, umrini o’rmonlarda poyoniga yetkazgan beqiyos dono ustozlarimiz haqqi, senga ta’zim qilaman, O’zbekistonim! Shu og’ir yo’llardan meni omon qaytargan sening mehring, sening issiq bag’ring, mening e’tiqodim, Tangrining beadad mehridir.

S.Ahmad. “Yo’qotganlarim va topganlarim”dan.

4-topshiriq. Mavzu bo’yicha olingan bilimlarni xulosalash maqsadida “Kichik guruhlarda ishlash” metodini qo’llang.