I bo‘lim. Umumiy qoidalar 1-bob. Asosiy qoidalar

129-modda. Arizaning (shikoyatning) va unga ilova qilinadigan hujjatlarning ko‘chirma nusxalarini yuborish
Arizachi ariza (shikoyat) berayotganda javobgarga va uchinchi shaxslarga arizaning (shikoyatning) va unga ilova qilingan, ularda bo‘lmagan hujjatlarning ko‘chirma nusxalarini yuborishi shart.
LexUZ sharhi
Qarang: mazkur Kodeksning 127, 128, 130-moddalari.
130-modda. Arizaga (shikoyatga) ilova qilinadigan hujjatlar
Arizaga (shikoyatga) quyidagilarni tasdiqlovchi hujjatlar ilova qilinadi:
1) belgilangan tartibda va miqdorda davlat boji to‘langanligini, agar bu ushbu toifadagi ishlar uchun qonunda nazarda tutilgan bo‘lsa;
Oldingi tahrirga qarang.
1¹) belgilangan tartibda va miqdorda pochta xarajatlari to‘langanligini;
(130-modda O‘zbekiston Respublikasining 2018-yil 11-oktabrdagi O‘RQ-496-sonli Qonuniga asosan 1¹-band bilan to‘ldirilgan — Qonun hujjatlari ma’lumotlari milliy bazasi, 12.10.2018-y., 03/18/496/2043-son)
2) arizaning (shikoyatning) va unga ilova qilingan hujjatlarning ko‘chirma nusxalari javobgarga hamda uchinchi shaxslarga yuborilganligini;
3) arz qilingan talablarga asos bo‘lgan holatlarni;
4) arizani (shikoyatni) imzolash vakolatini, agar u vakil tomonidan imzolangan bo‘lsa.
LexUZ sharhi
Qarang: mazkur Kodeksning 127 — 129, 131 — 134-moddalari.
131-modda. Arizani (shikoyatni) ish yuritishga qabul qilish to‘g‘risidagi masalani hal etish tartibi va muddatlari
Agar ushbu Kodeksda boshqacha qoida nazarda tutilmagan bo‘lsa, sudya arizani (shikoyatni) ish yuritishga qabul qilish to‘g‘risidagi, qabul qilishni rad etish yoxud qaytarish haqidagi masalani ariza (shikoyat) sudga kelib tushgan kundan e’tiboran besh kundan kechiktirmay yakka tartibda hal qiladi.
Arizani (shikoyatni) ish yuritishga qabul qilish, qabul qilishni rad etish yoki qaytarish to‘g‘risida ajrim chiqariladi, uning ko‘chirma nusxasi ishda ishtirok etuvchi shaxslarga u chiqarilgandan keyingi kundan kechiktirmasdan yuboriladi.
LexUZ sharhi
Qarang: mazkur Kodeksning 127 — 130, 132 — 134-moddalari.