Гормонал препаратлар (давоми) буйрак усти бези гормонларининг препаратлари

б) Гестаген (прогестин) ва антигестаген препаратлар
Барча гестагенлар стероид тузилишга эга. Дори воситаси сифатида прогестерон ёки унинг синтетик унумлари – оксипрогестерон капронати, медроксипрогестерон ацетати ва прегнин ишлатилади. Бундан ташқари, гестаген фаолликка эга бўлган тестостерон унумлари ҳисобланувчи препаратлар синтез қилинган – норгестрел, норэтиндрон, норэтистерон, диметистерон ва б.
Прогестерон эндометрийга таъсир қилиб уни тухум ҳужайранинг имплантациясига тайёрлайди. У миометрийнинг қўзғалувчанлигини сусайтиради, овуляциянинг олдини олади, кўкрак безларининг без тўқимаси ўсишига ёрдам беради. Ҳар куни м/о киритилади. Ичилганда таъсири юзага чиқмайди.
Оксипрогестерон капронати (гидроксипрогестерон капронати, гор-мофорт) давомли таъсирга эга. Таъсири аста-секин юзага чиқади ва 7-14 кун давом этади. Мойли эритмалари м/о киритилади. Давомли таъсирга эга бўл-ган препаратларга медроксипрогестерон ацетати ҳам киради. У м/о ҳар 14 кунда 1 марта киритилади. Шунингдек, уни ичиш ҳам мумкин.
Прегнин (этистерон) – фаоллиги бўйича прогестерондан 5-15 марта суст. Ичилганда самарадор, тил остига қўйилади. Таблеткаси тўлиқ эриб кетгунча тил остида ушлаб турилади.
Гестаген фаолликка эга бўлган тестостерон унумлари (норэтинодрел ва б.) ичишга тавсия этилади. Уларнинг таъсир давомийлиги 1-3 кунни ташкил этади.
Гестагенлар сариқ танача фаолиятининг етишмаслигида ҳомила туши-шининг олдини олиш учун (ҳомиладорликнинг биринчи ярмида), ҳайз кў-ришнинг бузилишларида ишлатилади. Контрацептив восита сифатида ҳам кенг қўлланилади.
Гестаген гормонларнинг антагонистлари – антигестаген воситалар яратилган бўлиб, уларнинг айримлари тиббиёт амалиётига тадбиқ этилган. Бундай препаратлардан бири – мифепристон (RU 486) бўлиб, стероид тузилишга эга. Асосан ҳомилани тушириш мақсадида ишлатилади. Препаратнинг самарадорлиги препаратни ҳомиладорликнинг қанчалик эрта муддатларида тавсия қилинишига боғлиқ.