Физика ва электроника асослари

SO‘Z BOSHI
Hozirgi kunda texnika taraqqiyoti jadal sur’atlar bilan ilgarilab bormoqda. Jumladan, texnik vositalar deyarli barcha san’at turlari tarkibida ham yetakchi vazifalardan birini o‘tab kelayotgani va o‘ziga xos yo‘nalishda rivojlanayotgani barchaga ayon. Aynan shu jabhalarda o‘zbek tilida yozilgan tegishli adabiyotlarning deyarli yo‘q darajada ekanligini ham ta’kidlash lozim. Umuman, bu jarayonni fizika va elektronika fanining asosiy qonunlarini bilmagan holda aniq tasavvur qilish qiyin, albatta. Talaba va o‘quvchilarga mazkur fanni o‘rganishlari va o‘zlashtirishlari uchun imkon yaratish bugungi kunning dolzarb masalalaridan biridir.
O‘quv qo‘llanma asosan O‘zbekiston davlat konservatoriyasining musiqiy ovoz rejissyorligi ixtisosligida tahsil ko‘rayotgan talabalar uchun mo‘ljallangan. Shu bilan birga, mazkur qo‘llanma boshqa oliy o‘quv yurtlarida musiqiy ovoz rejissyorligi ixtisosligiga yondosh mutaxassislik bo‘yicha ta’lim olayotgan talabalar hamda akademik litsey va kasb-hunar kollejlari o‘quvchilari uchun ham foydali bo‘lishi ko‘zda tutilgan. Qo‘llanmada zamonaviy elektron musiqiy cholg‘ular, ovoz yozish hamda eshittirish qurilmalarining asosiy turlari va ishlash prinsiplarini yoritishga ham e’tibor qaratilgan.
O‘kuvchilarga amaliy ish jarayonida foydali bo‘ladi degan maqsadda ayrim mavzularga doir misol va masalalar keltirilgan hamda ularni yechish yo‘llari ko‘rsatilgan. Qo‘llanmaga fizika va elektronikaga doir lug‘atlardan olingan ayrim ma’lumotlar ham kiritilgan.
Mualliflar, qo‘llanmaning yaxshilanishiga o‘z taklif va maslahatlari bilan hissalarini qo‘shgan Farg‘ona davlat universitetining «Fizika-texnika» fakulteti «Umumiy fizika va FUM» kafedrasining professori, f.m.-f.d., O‘zbekistonda xizmat ko‘rsatgan fan arbobi, Beruniy nomidagi davlat mukofotining sovrindori Bannop Otaqulovga hamda O‘zbekiston davlat konservatoriyasining prorektori, professor Soibjon Begmatovga minnatdorchilik bildirib qoladilar.
Qo‘llanmaning ikkinchi, qo‘shimchalar kiritilgan va to‘ldirilgan, nashri haqidagi fikr va mulohazalarni mualliflar samimiyat bilan qabul qiladilar.