Эксперт хулосасини расмийлаштириш тартиби / 2; 6; 8/
Эксперт хулосаси қуйидаги талабларга риоя қилган ҳолда расмийлаштирилиши зарур:
а) ёзма хулоса ёзув машинкасида ёки компьютерда стандарт ёзув қоғозида терилган бўлиши керак. Қоғоз четларида уни ишга тикиб қўйиш учун ва ҳошиялар қолдирилиши зарур;
б) ёзма хулоса ва унга қилинадиган иловалар икки нусхада бажарилади, биринчи нусха экспертиза тайинлаган органга жўнатилади, иккинчиси эса экспертнинг ўзида қолади;
в) ёзма хулосанинг матни қўлдан ўзгартирилса ёки унга қўшимча ёзувлар киритилса, унда бу ҳақда ушбу бетнинг қўйи қисмида у тузатилганлиги ёки унга қўшимча киритилганлиги ҳақида махсус белги бўлиши керак. Бунақа тузатиш шахсан эксперт томонидан қилиниши ва имзоланиши шарт;
г) техник ва бошқа махсус адабиётлардан фойдаланган ҳолатларда матннинг якуний қисмида бу ҳақда маълумотлар бўлиши керак (муаллиф, манбанинг тўлиқ номи, нашриёт, нашр этилган йил ва бетлар);
д) агар қилинган айрим хулосалар меъёрий ҳужжатлар ва қоидаларга асосланган бўлса, унда уларнинг тўлиқ номлари, тасдиқланган йили ва кучга кирган вақти, асосланаётган бандлар, параграфлар ёки моддалар, шунингдек уларнинг матнлари ҳам келтирилиши керак;
е) иллюстрациялар, чизмалар, схемалар, жадваллар, графиклар ва шу кабиларни тадқиқот қилиш қисмининг уларга асосланган жойларида келтириш ва тегишли имзолар билан тасдиқланиши тавсия этилади;
ж) ёзма хулоса тадқиқот ўтказган эксперт томонидан имзоланади. Агар хулоса бир варақдан ортиқ жойни эгалласа, унда эксперт ҳар бир вараққа алоҳида имзо чекади.
Ёнғин бўйича «рад этиш иши» ичида йиғиладиган ҳужжатларнинг рўйхати ва уларнинг қисқача мазмуни /2/
Ёнғин ҳақидаги хабарни олган пайтдан бошлаб ушбу ёнғин бўйича иш ёпилгунга қадар суриштирувчи томонидан қайси ҳужжатлар тузилиши зарурлиги ва бу ҳужжатларнинг қисқача мазмуни кўрсатиб ўтилади.
Агар ёнғин натижасида етказилган моддий зарар миқдори энг кам ойлик иш ҳақининг 1 баравари ва ундан ортиғини ташкил қилса, бундай ҳолларда ушбу ёнғинни текшириш якуни бўйича жиноят ишини қўзғатишни рад этиш Қарори тузилади. Лекин ушбу қарорни қабул қилгунга қадар суриштирувчи қуйидаги бир қатор ҳужжатларни йиғиши ва ишга тикиб қўйиши зарур:
1. ёнғин ҳақида Далолатнома;
2. воқеа жойини кўздан кечириш Баённомаси;
3. гувоҳлар, жабрланувчилар, гумон қилинувчи ва бошқа шахслардан олинган тушунтириш хатлари ёки сўроқ қилиш Баённомаси;
4. моддий зарар миқдори тўғрисидаги Маълумотнома;
5. ёнғин чиқишда айбдор бўлган шахсга нисбатан маъмурий жазо чораси қўллаш тўғрисидаги материаллар;
6. ёнғинни ҳисобга олиш варақаси;
7. текшириш якуни бўйича қабул қилинган қарор тўғрисида манфаатдор шахсларга жўнатилган Хабарнома нусхаси ва бошқалар;
Иш ҳолатларига қараб бошқа ҳужжатлар ҳам йиғилиши мумкин, масалан ашёвий далиллар бўйича ва экспертизага оид ва шу кабилар.
Do'stlaringiz bilan baham: |