Buxoro muhandislik- texnologiya instituti

4. Investitsiyalar to’g’risida tushuncha va uning iqtisodiyotga tutgan o’rni.

Korxonalar xo’jalik yuritish va ishlab chiqarish faoliyatining muhim jihatlaridan biri ishlab chiqarish va iqtisodiy salohiyatni rivojlantirish va saqlab qolishdir. Korxonalarning bu yo’nalishdagi faoliyati investistion faoliyat deb ataladi hamda “Investistion faoliyat to’g’risida” gi Qonun va boshqa huquqiy hujjatlar bilan tartibga solinadi.

Investistiyalar  korxonalar va xalq xo’jaligi miqyosida yangi ishlab chiqarish korxonalari yaratish yoki mavjud korxonalarni zamonaviylashtirish, ilg’or texnika va texnologiyalarni o’zlashtirish, mahsulot ishlab chiqarish va foyda (daromad) olishni ko’paytirish maqsadida uzoq muddatli mablag’lar kiritilishidir. Investistiyalar ijtimoiy ishlab chiqarish tuzilmasini yaxshilash, ishlab chiqarishdagi nomutanosibliklarini bartaraf qilish va iste’mol bozorini ta’minlashda alohida e’tiborga ega. Investistiyalarni shakllantirish va ulardan foydalanish, mamlakat va xo’jalik yurituvchi sub’ektlarning investistion siyosati asosida amalga oshiriladi. Bu siyosat birinchidan, kapital qo’yilmalarning ustivor yo’nalishlarini, ikkinchidan, ishlab chiqarish kuchlarini to’g’ri joylashtirish va rivojlantirish, uchinchidan, fan-texnik taraqqiyoti va butun iqtisodiyotning rivojlanishini belgilab beradi. Investistiyalarning “xo’jayini” sifatida korxonalarning o’zidan tashqari, davlatni, mahalliy hokimiyat idoralari va xususiy tadbirkorlarni ko’rsatish mumkin.

Ko’pincha investistiya deganda kapital qo’yilmalar ko’zda tutiladi, bu narsa investistiyalar tabiatini inkor qilmaydi va ularning mohiyatini noto’g’ri aks ettirmaydi. Investistiyalar, bozor iqtisodiyotidagi boshqa, jumladan, biznes, raqobatchilik, ishbilarmonlik tushunchalari kabi, ma’muriy-buyruqbozlik tizimidan bozor iqtisodiyotiga o’tilayotgan bugungi kunlarda xo’jalik yuritish nazariyasi va amaliyotida o’z o’rnini topmoqda. Shu bilan birga, “kapital qo’yilmalar” atamasining o’z izohlari ham mavjud.