Амалиёт дастури 2-курс

V. Амалиёт раҳбарларининг мажбуриятлари


5.1. Молия органи томонидан тайинланган раҳбарнинг мажбуриятлари:

Амалиёт базасида амалиёт учун жавобгарлик молия органи бошлиғига юклатилади. У қуйидагилар учун масъул ҳисобланади:

• 
  молия органи мутахассислари таркибидан амалиёт раҳбарини тайинлаш;
  
• 
  талабаларни амалиёт ҳисоботи учун талаб этилган маълумотлар билан таъминлаш;
  
• 
  талабалар учун молия органининг етук мутахассислари маслаҳатларини ташкил этиш;
  
• 
  талабанинг ташкилот ички иш тартибига риоя қилишини талаб қилиш;
  
• 
  амалиёт ўташ учун зарур шарт-шароитларни яратиб бериш;
  
• 
  ҳар бир талаба учун амалиёт юзасидан тавсифнома ёзиб бериш (тавсифномада талабанинг амалиётни қандай ўтагани, ўзига топширилган вазифаларни қай даражада бажаргани, меҳнат интизоми талабларига риоя қилиш ҳолати ва меҳнатга муносабати тўғрисида маълумот берилади);
  

Амалиёт даврида талаба мазкур молия органида ўриндошлик асосида ёки стажер сифатида ишлаши мумкин, бироқ молия органларидан ташқари бирор бошқа фаолият билан шуғулланиши маън этилади. Талабанинг бўш ўринларни эгаллаб бажарадиган иши амалиёт мақсад ва вазифалари билан бевосита боғлиқ бўлиши шарт. Амалиётни бошлашдан аввал молия органи томонидан тайинланган раҳбар талаба билан биргаликда амалиётнинг календар-мавзули режасини тузади ва тасдиқлайди. Режада бажариладиган ишлар, уларни бажариш жойи, сарфланадиган иш кунлари аниқ белгилаб қўйилади. (1-илова)


5.2. Кафедра томонидан тайинланган раҳбарнинг мажбуриятлари
Амалиётга кафедра томонидан тавсия этилган ва институт буйруғи билан тасдиқланган профессор-ўқитувчи раҳбарлик қилади. У ҳар ҳафтада бир марта кафедрада (имкониятлар доирасида – амалиёт базасида) талабалар билан учрашиб, амалиётнинг бориши, амалиёт кундалигининг юритилиши, вазифаларнинг бажарилиши, ҳисоботнинг расмийлаштирилиши кабилар юзасидан маслаҳатлар беради, бу борадаги мавжуд муаммоларнинг сабабини аниқлаб, уларнинг ҳал этилишига ёрдам беради.