A qodiriy nomidagi jizzax davlat pedagogika instituti tarix fakulteti

1989 – 1991 yillarni qamrab olgan bosqich. Bu bosqich yangi generatsiyaga mansub rahbarlardan biri Islom Karimovning Respublika rahbari lavozimiga kelishi, O‘zbekistonda mustaqillik g‘oyalarining pishib yetilishi, davlat mustaqilligi tarixiy tasodif voqelik ta’sirida emas, balki respublikada yuzaga kelgan ziddiyatli va murakkab vaziyatdan chiqish yo‘l-yo‘riqlarini qidirish hamda sobiq Ittifoq rahbariyatining O‘zbekiston yetakchisi Islom Karimov siyosatiga qarshi qaratilgan fitnalarining oldini olish bilan xarakterlanadi. Mazkur yillarning alohida davr sifatida e’tirof etilishida O‘zbekistonning birinchi Prezidenti I.Karimovning “O‘zbekiston mustaqillikka erishish ostonasida” asaridagi xronologik yondashuv ham ushbu davrning konseptual asosi hisoblanadi.
Keyingi bosqich o‘z ichiga 1991 yildan to 2000 yilga qadar bo‘lgan davrni o‘z ichiga qamrab oladi. Bu davrda milliy davlatchilik asoslari va ijtimoiy yo‘naltirilgan bozor iqtisodiyotini yuzaga keltirishga qaratilgan o‘tish davrining dastlabki islohotlar jarayoniga ilk qadamlar qo‘yildi.
Shu davrdan boshlab bir necha avlod davrida shakllanib kelgan va odamlar ongiga singib ketgan kommunistik mafkura aqidasidan voz kechilib, Milliy istiqlol g‘oyasining asoslari shakllandi. Buning ta’sirida hayotga demokratik qadriyatlarni mustahkamlash, mamlakatni jahon hamjamiyatiga integratsiyasiz tasavvur qila olmaydigan yangi avlod vakillari kirib kela boshladi. Bu esa mamlakatda tub siyosiy, iqtisodiy, ma’naviy-ruhiy o‘zgarishlarni bosqichma-basqich o‘sib borishiga xizmat qildi.
“Shok terapiyasi” nomini olgan o‘tish modelidan mutlaqo farq qiluvchi “o‘zbek modeli”ning hayotga joriy etilishi natijasida, tarixan qisqa davr ichida eski, ma’muriy-buyruqbozlikga asoslangan sovet tizimi o‘rniga milliy davlatchilik asoslarini yuzaga keltirishga qaratilgan huquqiy baza yaratildi. Demokratik an’analar asosida yangi davlat boshqaruv tizimi – qonun chiqaruvchi, ijro etuvchi va sud hokimiyati tashkil etildi hamda fuqarolik jamiyati asoslari yaratildi, erkin bozor iqtisodiyotiga o‘tila boshlandi. Bu davrda mamlakat mustaqilligini mustahkamlash bilan bir qatorda, milliy urf-odatlar, an’ana va qadriyatlarni saqlash hamda taraqqiy ettirish masalalari davlat siyosati darajasiga ko‘tarildi.