To‘rtinchi yo‘nalish - «YOsh oila» yo‘nalishi. Oila xalqimizda muqaddas dargoh sanaladi. 2012 yilni mamlakatimizda “Mustahkam oila yili” deb nomlanishi, unga muvofiq qabul qilingan davlat dasturini amalga oshirish o‘z samarasini berdi. Hozirgi kunda O‘zbekistonda salkam 7 mln. oila yashaydi, shundan 995 mingdan ortig‘i yosh oilalar hisoblanadi. YA’ni, respublikamizda yosh oilalar jami oilalarning 16% ini tashkil etadi. Barkamol yosh avlod, avvalo oilada ulg‘ayadi. Umuman, bu borada amalga oshirilayotgan kompleks chora-tadbirlar turli yillarning nomlanishida ham o‘z aksini topib kelmoqda. Xususan, 1998 yil - Oila yiliga bag‘ishlab ishlab chiqilgan Davlat dasturida belgilangan chora-tadbirlarning ijrosi orqali oilani ijtimoiy himoya qilish ko‘lamlarini yanada kengaytirish va kuchaytirishga erishildi. “YOshlar yili” deb nomlangan 2008 yilda yosh oilalarni qo‘llab-quvvatlash maqsadida 30 mlrd. so‘mdan ziyod imtiyozli kreditlar ajratildi.
Do'stlaringiz bilan baham: |