Ҳ. А. АрFинбоев, Ҳ. У. Абдуллаев, А. М

3.13. Қуёш радиациясини ва радиацион балансни ўлчаш усуллари
Ҳозирги вақтда актинометрик кузатишларда қуёш радиацияси оқимларини ўлчаш учун мутлақ ва нисбий усуллар қўлланилади. Шунинг учун бу усулларга мос равишда мутлақ ва нисбий асбоблар ишлаб чиқарилган.
Мутлақ асбобларда қуёш радиацияси энергетик ёритилганлигини тўғридан-тўғри кал/(см²∙мин) ёки Вт/м² бирликларда ўлчанади ва улар ҳозирги вақтда нисбий асбобларни даражалаш ва текшириш учун қўлланилади.
Нисбий асбоблар метеорологик станциялардаги мунтазам олиб бориладиган кузатишларда, экспедицияларда ва дала кузатишларида ишлатилади.
Тўғри радиацияни ўлчаш учун ишлатиладиган асбобни актинометр деб юритилади.
Ҳозирги вақтда тўғри қуёш радиациясини ўлчашда энг кўп қўлланиладиган нисбий асбоб Савинов- Янишевский термоэлектрик актинометридир.
Актинометр ишлаши учун термоэлектрик эффект асос қилиб олинган. Маълумки, икки хил металл ўтказгичнинг иккала учларини ўзаро кавшарлаб, берк электр занжири ҳосил қилсак, кавшарланган учларнинг ҳароратлари бир-биридан фарқ қилса, мазкур занжирдан жуда оз миқдорда ток ўтади. Занжир очиқ бўлганда вужудга келадиган термо электр юритувчи куч (э.ю.к.) нинг катталиги кавшарланган учлар ҳароратлари айирмасига ва кавшарланган ўтказгичларнинг моддаларига боғлиқ бўлади.
Каттароқ ток олиш учун бундай термо жуфтларни ўзаро кетма-кет уланади.
Термоэлектрик актинометрларнинг асосий қисмлари: термобатареяли ютгич, ичига термобатареяли диск жойлаштирилган трубка ва штативдан иборат.
Актинометрнинг асосий қисми, яъни термобатареяли ютгич манганин ва константан полоскаларининг кетма-кет уланишидан ҳосил қилинган термобатарея юлдузча шаклида жойлаштирилган.
Барча тоқ номерли кавшарланган учлар марказ атрофида, жуфт номерли кавшарланган учлар эса чеккада ўрнатилган.
Актинометрдан фойдаланилган вақтда термоюлдузчанинг иккала учини ГСА-1 типдаги гальванометрга уланади.
Актинометр трубкасининг очиқ учи рўпарасига тескари томонига тоқ номерли кавшарлар ёпиштирилган ва қуёш нурлари тушадиган томони қорайтирилган кумуш диск жойлаштирилади. Мис ҳалқа эса трубканинг четига қуёш нурлари тушмайдиган қилиб жойлаштирилган. Агар актинометр трубкасини Қуёшга қаратсак, марказдаги кумуш диск тўғри қуёш радиацияси таъсирида исийди, мис ҳалқа эса исимайди. Тўғри қуёш радиациясининг энергетик ёритилганлиги қанчалик катта бўлса, иссиқ ва совуқ кавшарлар орасидаги ҳароратлар айирмаси ҳам шунчалик орта боради. Натижада ҳосил бўладиган термотокнинг катталиги ҳам тўғри қуёш радиацияси энергетик ёритилганлигига тўғри мутаносиб равишда ортади. Актинометрга уланган гальванометр учун аввалдан маълум бўлган актинометр доимийсига кўпайтириш билан кал/(см²∙мин) ёки Вт/м² бирликларга ўтказилади.