Aloqa va xabar berish tizimining asosiy vazifalari:
signallarni o‘z vaqtida berish va qabul qilib olish, FVDT tegishli rejimlarini o‘rnatish xususida farmoyish yuborish;
FVDT boshqaruv organlari o‘rtasida quyidan yuqoriga va yuqoridan quyiga axborot almashinishining ishonchli bo‘lishini ta’minlash;
Fuqaro muhofazasi bo‘limlari, boshqarmalari, xizmatlari va kuchlari bilan axborot almashinuvini ta’minlash;
FVDT boshqaruv organlari tomonidan bashorat qilingan yoki sodir bo‘lgan favqulodda vaziyatlar to‘g‘risida aholiga o‘z vaqtida xabar berish.
O‘zbekiston Respublikasi vazirlik va idoralari xabar berish va axborot uzatish tizimining aholini va hududlarni favqulodda vaziyatlardan muhofaza qilish bo‘yicha vazifalari:
fuqaro muhofazasi tadbirlarini o‘tkazish chog‘ida aloqa tizimlarining ishonchli va barqaror ishlashini tashkil etish va amalga oshirish;
idoraviy potensial xavfli ob’ektlarda signalizatsiya va xabar berishning mahalliy avtomatlashtirilgan tizimini yaratish;
aholini favqulodda vaziyat xavfi tug‘ilganligi va sodir bo‘lganligi to‘g‘risidagi axborot bilan ta’minlash.
O‘zbekiston Respublikasining “Aholini va hududlarni tabiiy hamda texnogen xususiyatli favqulodda vaziyatlardan muhofaza qilish to‘g‘risida”gi va “Fuqaro muhofazasi to‘g‘risida”gi qonunlari, O‘zbekiston Respublikasi Prezidentining “O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida” 2017 yil 7 fevraldagi PF-4947-son hamda “Favqulodda vaziyatlarning oldini olish va bartaraf etish tizimi samaradorligini tubdan oshirish chora-tadbirlari to‘g‘risida” 2017 yil 1 iyundagi PF-5066-son farmonlarini bajarish, O‘zbekiston Respublikasi Favqulodda vaziyatlarda ularning oldini olish va harakat qilish davlat tizimi kuch va vositalarining harakat qilishga tayyorgarligini oshirish, shuningdek aholiga favqulodda vaziyatlar xavfi yoki sodir bo‘lganligi haqida o‘z vaqtida xabar berish va ma’lumot (axborot) etkazish maqsadida 2017 yil 8 avgustda O‘zbekiston Respublikasi Vazirlar Mahkamasining “Favqulodda vaziyatlar xavfi yoki sodir bo‘lganligi haqida O‘zbekiston Respublikasi aholisiga xabar berish va ma’lumot (axborot) etkazishning avtomatlashtirilgan tizimini yaratish va rivojlantirish to‘g‘risida”gi 601-sonli Qarori qabul qilindi.
Ushbu Qaror bilan Favqulodda vaziyatlar xavfi yoki sodir bo‘lganligi haqida O‘zbekiston Respublikasi aholisiga xabar berish va ma’lumot (axborot) etkazishning avtomatlashtirilgan tizimining (XMAT) tashkiliy-funksional tuzilmasi hamda Favqulodda vaziyatlar xavfi yoki sodir bo‘lganligi haqida O‘zbekiston Respublikasi aholisiga xabar berish va ma’lumot (axborot) etkazishning avtomatlashtirilgan tizimi to‘g‘risidagi Nizom tasdiqlandi.
XMATning asosiy vazifalari:
favqulodda vaziyatlar xavfi yoki sodir bo‘lganligi haqida ma’lumotlarni yig‘ish, ishlov berish, saqlash va etkazish texnologik jarayoni majmuini avtomatlashtirishni ta’minlash, favqulodda vaziyatlar holatida muhofaza usullari va aholining harakatlari, yuzaga kelgan vaziyat to‘g‘risida aholiga xabar berish va ma’lumotlarni etkazishda barcha jarayonlarni real vaqt ko‘lamida monitoring qilish;
favqulodda vaziyatlar xavfi yoki sodir bo‘lganligi haqida respublika aholisiga xabar berish va ma’lumot (axborot) etkazish;
boshqaruv organlari, O‘zbekiston Respublikasi favqulodda vaziyatlarda ularning oldini olish va harakat qilish Davlat tizimi kundalik boshqaruv organlari, respublika hududida favqulodda vaziyatlarni bartaraf etish uchun mo‘ljallangan va ajratiladigan (jalb qilinadigan) maxsus tayyorlangan kuch va vositalarga favqulodda vaziyatlar xavfi yoki sodir bo‘lganligi to‘g‘risida xabar berish va ma’lumot (axborot) etkazish.