Халқ таълими ходимлари асосий лавозимларининг малака тавсифлари

11-боб. Республика болалар кутубхонаси, Ахборот-ресурс марказлари, таълим муассасалари кутубхоналари ходимларининг малака тавсифлари


79-§. Республика болалар кутубхонаси, Ахборот-ресурс маркази директори
лавозимининг малака тавсифлари

Тартиб рақами	532
Машғулотларнинг миллий стандарт классификатори бўйича коди	1319
Ходимлар тоифаси	Бошқарув

235. Лавозим вазифалари:

а) ахборот-кутубхона муассасасининг (бундан буён матнда кутубхона деб юритилади) умумий фаолиятига раҳбарлик қилиш;
б) кутубхонага юклатилган вазифа ва касбий мажбуриятларни бажариш, унинг иш фаолиятини самарали ташкил этиш ҳамда ижро интизомига риоя қилиш;
в) кутубхонанинг йиллик ва истиқбол иш режаларини шакллантириш, уларни ўз вақтида сифатли бажарилишини назорат қилиш;
г) кутубхона бўлим бошлиқлари иш тақсимотини, ходимларнинг йиллик иш режаларини тасдиқлаш ва улар томонидан ўзига юклатилган вазифаларнинг бажарилишини назорат қилиш;
д) кутубхонада ташкил этиладиган ўқув семинар-тренинглар, конференциялар, дастурларни тасдиқлаш, унинг бажарилишини, иш фаолиятининг сифат ва самарадорлиги устидан назорат қилиш;
е) кутубхонанинг ахборот излаш тизимларини яратиш ишларидаги инновацион жараёнларни библиографик, ахборот, методик, илмий-тадқиқот фаолиятига жорий этилишини амалга ошириш;
ж) кутубхонага ажратилган бюджет маблағлари ва бошқа бюджетдан ташқари тушумлардан тўғри фойдаланишни таъминлаш ҳамда унинг мулкига эҳтиёткорона муносабатда бўлиш;
з) кутубхонанинг ходимларга бўлган эҳтиёжини аниқлаш, кадрларни танлаш ва жой-жойига қўйиш, юқори малакали мутахассислар билан тўлдириш, уларнинг касбий маҳоратларини ривожлантириш бўйича чора-тадбирларни амалга ошириш ҳамда кадрлар захирасини шакллантириш;
и) кутубхона ходимларини қайта тайёрлаш ва уларнинг малакасини оширишни, ходимлар аттестациясини ҳамда улар томонидан меҳнат интизомига риоя қилинишини назорат қилиш;
к) кутубхона ходимларининг вазифалари, лавозим мажбуриятларини белгилаш, улар орасидаги энг фаолларини рағбатлантириш, ўз ваколати доирасида интизомий жазо чораларини қўллаш масалаларини кўриб чиқиш;
и) жамоада соғлом маънавий муҳитни шакллантириш, ички меҳнат тартиби қоидаларини ўрнатиш;
л) корхона, муассаса ва ташкилотлар билан хўжалик шарномалари тузишда кутубхона номидан фаолият юритиш, унинг манфаатларини ҳимоя қилиш, ўрнатилган тартибда ишончномалар бериш, турли йўналишдаги давлат ва нодавлат ташкилотлар билан ўзаро ҳамкорликда иш юритиш;
м) кутубхонанинг моддий-техника базасини мустаҳкамлашга оид чора-тадбирларни амалга ошириш, ўқув жиҳозлари, асбоб-ускуналар ва бошқа таълим воситаларининг сақланишини ҳамда улардан самарали фойдаланишни таъминлаш;
н) кутубхонанинг фойдаланувчиларига ахборот-кутубхона ресурслари хизматини кўрсатиш ҳамда унинг босма ва электрон фондини шакллантириш;
о) жисмоний ва юридик шахсларнинг ёзма ҳамда оғзаки мурожаатларини, ариза ва шикоятларини кўриб чиқиш;
п) санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидалари талабларига риоя қилиш.
236. Билиши лозим:
а) халқ таълимига оид ва болалар ҳуқуқларини тартибга солувчи ҳамда ахборот-кутубхона фаолиятини такомиллаштиришга тегишли амалдаги норматив-ҳуқуқий ҳужжатларни, шу соҳадаги янгиликларни;
б) ахборот-кутубхона иши назарияси ва амалиётини, методик ишларни ташкил этиш ва самарадорлигини ошириш усулларини;
в) кутубхона моддий-техник базасини мустаҳкамлаш ва ривожлантириш ишларини ташкил қилиш ва унинг бажарилиши устидан назорат олиб боришни;
г) кадрларни танлаш ва жой-жойига қўйиш усулларини, уларнинг малакасини ошириш ва қайта тайёрлаш тартибини;
д) жамоада соғлом маънавий муҳитни шакллантириш, аҳил-иноқликни мустаҳкамлаш бўйича фаолият юритишни;
е) кутубхона ички тартиб-қоидаларининг ходимлар томонидан бажарилишини назорат қилишни, уларга самарали ишлаши учун етарли шарт-шароитлар яратиб бериш йўлларини;
ж) кутубхонанинг бюджетдан ташқари маблағ топиш фаолиятини ташкил этиш ва бу маблағларнинг амалдаги қоидалар асосида сарф этилишини таъминлашни;
з) санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидаларини.
237. Малака талаблари:
а) ўз йўналиши бўйича камида бакалавр даражасидаги олий ёки педагогик маълумот;
б) хорижий тиллардан бирининг бошланғич босқичини ва ахборот-коммуникация технологияларидан фойдаланишни билиши;
в) камида беш йиллик иш стажи.