Guruh rahbarining faoliyatida pedagogik mahoratning ahamiyati

2.2. Guruh rahbari pedagogik mahoratini aniqlash ishlari tahlili

O‘qituvchi-guruh rahbarining pedagogik mahoratini rivojlantirish uchun uning mahorat darajasini aniqlash zarur. Buni ayniqsa, yosh pedagog-o‘qituvchilarning yangi pedagogik faoliyatlarini boshlashlarida aniqlash talab etiladi va unga muvofiq yosh o‘qituvchining mahoratini oshirish va rivojlantirish dasturini ishlab chiqish mumkin.

O‘qituvchining pedagogik mahoratini aniqlashda «Pedagogik vaziyat»ni aniqlash metodikasidan foydalanish yaxshi natija beradi. Biz ishimiz davomida Andijon viloyati Jalolquduq tumanidagi 24-maktab pedagogik jamoasi 4 nafar yosh o‘qituvchilarining pedagogik mahoratini aniqlashda bu metodikadan foydalandik.
Bu metodikada keltirilgan qator pedagogik vaziyatlardan chiqib ketish orqali insonning pedagogik qobiliyatlari haqida fikr yuritish imkonini beradi.
Tadqiqotni o‘tkazishdan avval sinaluvchilarga quyidagi ko‘rsatma berildi:
«Sizga qator murakkab pedagogik vaziyatlar havola etilgan. Har birining mazmuni bilan tanishib chiqib, berilgan variantlar ichidan o‘zingizga ma’qul bo‘lganini tanlang.
Agar taklif etilgan variantlar sizga ma’qul bo‘lmasa, u holda o‘zingiz boshqa bir variantni taklif eting va 7 raqami ostiga yozing.


1- vaziyat
Siz dars o‘tyapsiz, barcha o‘quvchilar tinchlanib, sinfda sokinlik hukm surmoqda, birdaniga kimdir qattiq kulib yubordi. Siz hech narsa deyishga ulgurmay savol nazari bilan, hayron bo‘lib o‘sha o‘quvchiga qaradingiz. U esa ko‘zingizga tik qarab shunday dedi: “Siz dars o‘tayotganingizda meni har doim kulgim keladi” Bu vaziyatga qanday munosabat bildirasiz?

Quyida taklif etilgan variantlardan birini tanlang va belgilang.

1. “Seni qara-ya!”
2. “Nimasi kulgili bo‘ldi?”
3. “Bilganingdan qolma!”
4. “Nega o‘zingni bunday tutasan?”
5. “Quvnoq odamlarni yaxshi ko‘raman”.
6. “Kayfiyatiningni ko‘targanimdan xursandman”.
7.
2- vaziyat
Sizni maktabga ishga qabul qilishdi va bir necha dars o‘tganingizdan so‘ng bir o‘quvchi oldingizga kelib shunday dedi: “Siz pedagog sifatida bizga biron-bir narsani o‘rgatasiz, deb o‘ylamayman”
Sizning munosabatingiz:
1. «Seni ishing o‘qish, menga aql o‘rgatish emas».
2. «Senga o‘xshaganlarni men albatta, hech narsaga o‘rgata olmayman».
3. «Balki sen boshqa sinfga o‘tib o‘qisang yaxshi bo‘larmidi?»
4. «Sen o‘zing o‘qishni hohlamaysan».
5. «Nima uchun bunday o‘ylashing meni qiziqtirmoqda».
6. «Kel, bu haqida ikkalamiz gaplashib olamiz. Balki mening hulq-atvorimda seni bunday fikrga borishing uchun biror bir asos bordir».