Gravimetrik analiz

Gravimetrik analizga doir masala va misollar

Analiz cho‘ktirish usuli bilan olib borilganda, odatda, miqdori aniqlanishi kerak bo‘lgan modda emas, balki unga ekvivalent bo‘lgan ikkinchi modda — tortiladigan shakl tarozida tortiladi. Masalan, bariy xlorid tarkibidagi bariyning miqdorini aniqlashda elementar bariyni emas, balki analizda olingan uning birikmasi BaSO₄ tortiladi. Xuddi shuningdek, kalsiyni aniqlashda CaO, magniyni aniqlashda Mg₂P₂O₇, xlor ionini aniqlashda AgCl tortiladi va hokazo.

Aniqlash oxirida tortiladigan shaklning topilgan miqdori (og‘irligi o‘zgarmay qolguncha qizdirilgan cho‘kmali tigel va bo‘sh tigel og‘irliklarining farqi) aniqlanayotgan moddaning qancha miqdoriga to‘g‘ri kelishini hisoblash kerak.