Gips baylanistiriwshilari 3 tu’rli usilda islep shig’ariladi

Zamanago’y qurilis kompaniyalari ta’repinen qollanilatug’in ko’plegen materiallar ha’m texnologiyalar a’yyemgi zamanlardan berli belgili bolg’an.
Ma’selen gips a’yyemgi Misrda bunnan shama menen 6 min’ jil aldin qurilis materiali sipatinda qollanilg’an. Biraq jan’a qurilis materialinin’ atamasi a’yyemgi grekler ta’repinen oylap tabilg’an ha’m oni “gipros” (кипящий камень) dep atag’an.
Gips orta a’sirlerde Fransiya ma’mleketinde u’lken ko’lemde islep shig’arila baslang’an. Bunin’ tiykarg’i sebebi bolsa 1666-jili London qalasinda ju’z bergen iri ko’lemdegi o’rtten son’ qurilisinda gips baylanistiriwshilari paydalanilg’an imaratlar basqa imaratlarg’a salistirg’anda bir qansha az mug’darda ja’bir ko’rgeni aniqlang’an. Ha’m sol da’wirlerde Fransiya hu’kimeti ta’repinen Parij qalasindag’i qurilis jumislarinda gipsten paydalaniw ma’jbu’riy etip qoyilg’an. Sol sebepli gips Evropa ma’mleketleri arasinda sol waqitlari “Parij shtukaturkasi” atamasin alg’an. Gips sol da’wirlerde tiykarinan Monmart qalasinda qazip aling’an.
Biraq, bul materialdin’ zamanago’y ta’riyxi 1894-jili yag’niy amerikaliq Avgust Sackett ta’repinen gipsokartong’a patent aling’an waqittan baslang’an desek aljaspaymiz. Sackettin’ oylap tapqan gipsokartoninin’ qalin’lig’i 5 mm bolip ol oz’-ara gips ja’rdeminde biriktirilgen 9 qatlamli qag’azdan ibarat bolg’an. Onnan keyinda gips boyinsha bir neshe ilimpazlar ha’r qiyli izleniwler alip barg’an, bir neshe zavodlar qurilg’an. Biraq 1932-jili 2 nemis ka’n injeneri Alfons ha’m Karl Knauf ha’mmemizge belgili bolg’an “Gebrüder Knauf Westdeutsche Gipswerke”(KNAUF) kompaniyasina tiykar salg’an.
Gips baylanistiriwshilari – bul poroshok ta’rizli minerallar bolip, ol tiykarinan suwli kalciydin’ degitrataciyasinan payda bolg’an o’nim bolip esaplanadi. (Degitrataciya-bul materialdag’i ximiyaliq ha’m fizikaliq birikken suwlardin’ a’ste aqirin jog’aliwi).
Gips baylanistiriwshilari 3 tu’rli usilda islep shig’ariladi:
-Gips tasi maydalap tu’yiledi ha’m pisiriledi.
-Gips tasin maydalap, pisirip son’inan tu’yiledi.
-Gips tasin maydalap, joqari basimli suw puwinda islew beriledi ha’m qurg’atilip tu’yiledi
Gips tasin tiykarinan, aylanbali barabanlarda, puw qazanlarinda yamasa avtoklablarda pisiriledi. A’melde gipsti qazanlarda pisiriw ken’ tarqalg’an. Polat cilindr ha’m tik ornatilg’an aralastirg’ishtan ibarat bolg’an qazang’a poroshok qilip tu’yilgen gips salinadi. Qazannin’ diametri boylap 4 dana isitiwshi truba o’tkizilgen. Eki molekula suwi bolg’an kalciy sulfatin 120-180 °C temperaturada qizdirg’animizda ol o’z qa’siyetin o’zgertiredi ha’m quramindag’i suw a’ste aqirin kemeyib degitrataciyalanadi. Bunda gips tasi 1,5 molekula suwdi jog’altib, yarim molekula suwli gipske aylanadi, buni biz to’mendegi reakciya arqali ko’riwimiz mu’mkin:
СаS 4 2H2O=CaSO4 0,5H2O+1,5H2O
Gips baylanistiriwshilari tek g’ana sibaw jumislarinda emes, ko’lemli qurilis buyimlarin aliwdada ken’ ko’lemde isletiledi. Gips baylanistiriwshilarin aliwda shiyki o’nim sipatinda ta’biyiy taw jinslari (gipsli taw jinslari, angidrit) ha’m quraminda kalciy sulfat bolg’an islep shig’ariw shig’indilari (fosfogips, borogips, altin ku’kirt islep shig’ariwdag’i shig’indilar) paydalaniladi.
O’zbekistanda gips baylanistiriwshilarin islep shig’ariw Buxara ha’m Ferg’ana wa’layatlarinda jaqsi rawajlang’an. Tashkent, Ferg’ana, Samarqand wa’layatlarinda islep shig’ariw shig’indilarinan paydalanip gips islep shig’ariw u’stinde bir qansha jumislar alip barilip atir.
Ha’zirgi ku’nde Qitay, Iran, AQSH, Ispaniya, Fransiya, Tailand siyaqli ma’mleketler gips islep shig’ariw boyinsha jetekshi orinlardi iyeleydi. Jer ju’zinde gipske bolg’an talap jildan jilg’a artip baratir desek aljaspaymiz. Misali 2000-jillari jer ju’zinde shama menen 35-40 mln tonna gips islep shig’arilg’an bolsa 2010-jilg’a kelip bul ko’rsetkish 147-mln tonnag’a jetken ha’m waqit o’tiwi menen bul ko’rsetkish artip atir.
Biraq bunday u’lken ko’rsetkishlerge qaramastan gips baylanistiriwshilari ha’m buyimlari belgili ortaliqlarda, yag’niy hawa ig’allig’i 60% ten joqari bolmag’an imarattin’ ishki bo’limlerinde ken’ qollaniladi. Al fasad jumislarinda bolsa ju’da kem jag’daylarda qollaniladi. Bunin’ tiykarg’i sebebi etip gips baylanistiriwshilari ha’m buyimlarinin’ suwg’a shidamlilig’inin’ to’menligi bolip esaplanadi.
Gips baylanistiriwshilarinin’ suwg’a shidamlilig’inin’ jeterli da’rejede emesliginin’ sebeplerin ilimpazlar ha’r qiyli qilip tu’sindiredi.
P.P.Budnikovtin’ pikirinshe gipstin’ suwg’a shidamlilig’in’ to’menliginin’ tiykarg’i sebebi gipstin’ eriwshen’liginin’ salistirmali joqari ekenligi (20 °C temperaturada 2,04 gr/l) ha’m sol sebepli digidrat kristallarinin’ eriwi na’tiyjesinde gips o’nimlerinin’ geweklerinde kalciy sulfatinin’ toying’an eritpesi payda boladi ha’m bekkemligi to’menleydi [1]. P.A.Rebinder ha’m bir qansha ilimpazlardin’ pikirinshe ig’allang’an gips baylanistiriwshilarinin’ bekkemliginin’ to’menlewine mikro jariqlardin’ ishki ju’zeleri menen ig’alliqtin’ adsorbsiyasi ha’m suw plyonkalarinin’ sebep boladi ha’m bunin’ na’tiyjesinde kristall strukturanin’ jeke mikroelementleri ajiralip shig’adi. Adsorbsion ta’sir gips baylanistiriwshilarinin’ gewekligi na’tiyjesinde ku’sheyedi. Gips baylanistiriwshilarinin’ suwg’a shidamlilig’inin’ to’menligi usi tiykarg’i faktorlardin’ bir waqittag’i ta’siri menen tu’sindiriledi desek boladi [2-5].
Joqaridag’i aytilg’anlardi uliwmalastirip to’mendegi pikirge keliwimiz mu’mkin:
Gips baylanistiriwshilarinin’suwg’a shidamlilig’inin’ to’menligi kalciy sulfat digidratinin’ joqari eriwshen’ligi, kristall strukturanin’ joqari o’tkiziwshen’ligi ha’m kristall araliq bosliqlarg’a kirip atirg’anda suw molekulalarinin’ tartilisiw ha’reketi menen baylanisli.

Paydalanilg’an a’debiyatlar:

1. Будников П.П. “Гипс, его исследование и применение.” — М. Стройиздат, 1951. – 418 bet.
2. Ребиндер П.А. “Физико-химические основы водопроницаемости строительных материалов.” - М., Госстройиздат, 1953. -184 bet.
3. Волженский А.В., Ферронская А.В. “Гипсовые вяжущие и изделия.” - М.: Стройиздат, 1974. 328 bet.
4. Ферронская А.В. “Долговечность гипсовых материалов, изделий и конструкций.” - М. Стройиздат, 1984. - 286 bet.
5.Волженский А.В., Стамбулко В.И., Ферронская А.В. Гипсоцементнопуццолановые вяжущие, бетоны и изделия. - М.: Стройиздат, 1971. - 318 bet.