Geografiya kafedrasi

Junubiy turistik rayoni. 
Ushbu turistik rayon o‘zining tarixiy va tabiiy rekreatsiya 
imkoniyatlari jihatidan boshqa turistik rayonlardan ajralib turadi.Qashqadaryo viloyatining 
betakror tabiati, Amir Temur qurdirgan Oqsaroy ansambli, ko‘plab diniy ziyoratgoh va madaniy 
yodgorliklar, milliy an‘ana va udumlari, to‘y va marosimlari mintaqada turizmning ko‘plab 
turlarini tashkil etish va rivojlantirish imkonini yaratadi. Ayni paytda u bilan chegaradosh 
Surxondaryo vohasi o‘zining ming yillik tarixi va muqaddas qadamjolari, tabiiy sharoiti va 
o‘ziga xos mikroiqlimi sayyohlikni rivojlantirishda ahamiyatlidir.
Bu yerda yashab ijod etgan buyuk siymolardan At-Termiziy ziyoratgohi, yuzlab tarixiy 
obidalar, arxitektura yodgorliklari, jumladan, eramizdan oldingi shahar va qal‘alar 
xarobalarining halqaro turizmdagi o‘rni nihoyatda muhimdir.
Viloyatda tabiiy go‘zal va o‘ziga xos tabiati, rel‘efi turizmning turli yo‘nalishlarini 
rivojlantirish imkonini beradi. Ayniqsa, Xisor tog‘ining go‘zal manzarasi va undagi ko‘plab 
shifobaxsh buloq va chashmalar aholining ishdan bo‘sh vaqtlarida miriqib dam olishi va 
salomatligini tiklashga xizmat qiladi. SHuningdek, bu yerda yashayotgan xalqning uzoq o‘tmish 
an‘analari, san‘ati, madaniyati va urf-odatlari, mahalliy hamda jahon sayyohlarini qiziqtirishi 
shubhasizdir. A. Ro‘ziev ta‘rifi bilan aytganda, «bu hudud turizm sohasida ochilmagan qo‘riq 
bo‘lib, turistik boyliklari hali kashf etilmagan» (Ro‘ziev, 1996).