Respublika ta’lim markazi

2010-2011 O‘QUV YILIDA UMUMIY O‘RTA TA’LIM MAKTABLARINING 8-SINF O‘QUVCHILARI UCHUN BOSQICHLI IMTIHON MATERIALLARI VA METODIK TAVSIYALAR

Maktab metodbirlashmalari imtihon biletlariga 15-20 % hajmda o‘zgartirishlar kiritishi mumkin.

GEOGRAFIYA

8-sinf

So`z boshi
Umumiy o‘rta ta‘lim maktablarining 8-sinfini tugatgan o‘quvchilar geografiya fanining 5-8 sinf mavzulari bo‘yicha ma’lum darajada bilimga ega bo‘ladilar.

O‘quvchilarning olgan bilim, malaka, ko‘nikmalarini aniqlash maqsadida 2010- 2011 o‘quv yilida 8- sinflarda geografiya fanidan og‘zaki bosqichli nazorat ishi bilet savollariga og‘zaki javob berish usulida o‘tkaziladi.

Har bir o‘quvchining bilim, ko‘nikma va malakalarini aniqlash uchun 2 ta nazariy va 1 ta amaliy topshiriq beriladi.

Bosqichli nazorat bilet savolining 2 ta nazariy savollari o‘quvchilarning 8-sinfda “O‘zbekiston iqtisodiy va ijtimoiy geografiyasi” kursi yuzasidan o‘rganilgan mavzulari bo‘yicha va 1 ta amaliy topshiriq 5-8 sinf mavzulari yuzasidan beriladi: Bilet savollariga Respublikamizning tabiiy sharoiti va tabiiy boyliklarining millliy iqtisodiyotdagi ahamiyati, milliy iqtisodiyotning tarmoqlari, aholi va u inson omili, Respublika yoqilg‘i energetikasi, agrosanoat majmuasi, aholiga xizmat ko‘rsatish va turizm, O‘zbekiston iqtisodiyotining hududiy tashkil etilishi (iqtisodiy rayonlar) va boshqa tushuncha va amaliy topshiriqlar kiritiladi.

Har bir berilgan savolga javob 5 ballik tizim asosida baholanadi. Masalan: 1-savolga 3, 2-savolga 4, 3-savolga 5 qo‘yilib, baholar umumlashtirilib o‘rtacha ball chiqariladi. 3+4+5 =12:3=4

O‘quvchilarni baholashda ball ular egallashlari lozim bo‘lgan bilim, ko‘nikma va malakalardan kelib chiqib belgilanadi.