Геодезиядан 1-практикум

План ва карталарнинг масштаблари

План, карта ва профиль жойда ўлчанган горизонтал, вертикал узунликларни бир неча марта кичрайтириб коғозга тушириш орқали чизилади. Узунликни кичрайтириб ёки катталаштириб ифодалашга масштаб дейилади.
Планнинг масштаби деб пландаги кесма узунлигининг жойдаги узунлигига мувофиқ S горизонтал қўйилишига бўлган нисбатига айтилади, яъни
, (3.1)
бу ерда М - масштаб махражи.
Планнинг масштаби унинг барча нуқталарида доимий бўлади. Картанинг масштаби эса, ҳар бир нуқтада ўз хусусий қийматга эга бўлиб, у берилган нуқтанинг кенглик ва узоқлигига боғлиқдир. Шунинг учун унинг қатъий сонли тавсифи бор. Хусусий масштаб - картадаги чексиз кичик кесма узунлиги l ни эллипсоид сиртидаги чексиз кичик кесма узунлиги нинг нисбати ҳисобланади. Лекин, картада амалий ўлчашларни бажаришда (3.1) формула орқали аниқланадиган бош масштаби қўлланади. Шунда, М махраж эллипсоид ўлчамини картада ўртача неча марта кичрайтиб тасвирланишини кўрсатади.
Масштабларни ифодалаш шакллари. Масштабларни план ва карталарда уч шаклда ифодалаш мумкин: сонли, ёзувли ва чизиқли масштаблар.
Сонли масштаб. Сурати бир бўлиб, махражи кичрайтириш даражасини кўрсатувчи оддий каср сонли масштаб дейилади. Топографик карталар учун стандартли сонли масштаблар қабул қилинган: 1:1 000 000, 1:500 000, 1: 300 000, 1:200 000, 1:100 000, 1:50 000, 1:25 000, 1:10 000.
Топографик планларнинг асосий масштаблари эса 1:5000, 1:2000, 1:1000 ва 1:500 ни ташкил этади. Лекин ер тузиш амалиётида ердан фойдаланиш планларини кўпинча 1:10 000 ва айрим ҳолатларда 1:25 000 масштабларда тайёрланади.
Сонли масштаб махражи кичик бўлса - йирик масштаб бўлиб, масштаб махражи катта сондан иборат бўлса, майда масштаб ҳисобланади. Масалан, 1:10 000 масштаб 1:100 000 масштабга нисбатан йирик, 1:50 000 масштаб эса 1:10 000 масштабга нисбатан майда ҳисобланади.