Газлама ва қоғоздан гуллар ясаш технологияси

«Гуллаган шафтолининг новдаси» ни ясаш
Машғулот вазифалари: болаларда қоғозни бир неча маротаба буклаб қирқиш асосида гул баргларини ҳосил қилиш‚ гул баргларини новдага елимлаб, чиройли гуллаган шафтоли новдасини ясаш малакаларини ўстириш.
Машғулотга тайёргарлик.
Болалар билан ҳовли ёки кўчадаги гуллаган шафтоли дарахтини кузатиш. Гулларнинг тузилишига, рангига, новдада жойлашишига болаларни эътиборларини жалб қилиш.
Машғулотнинг бориши:
Тарбиячи: болажонлар, мана ўлкамизда баҳор фасли. Баҳорда табиатда жуда катта ўзгаришлар рўй беради. Шоирларимиз айтганидек:
Келди баҳор, гул баҳор‚
Эриб битди, оппоқ қор.
Учиб келди, қушларжон
Дарахтлар тақди маржон.
Ҳа, «дарахтлар тақди маржон». Шоирларимиз, дарахт куртакларини маржонга ўхшатишяпти, бир оз вақт ўтгандан сўнг, дарахтимиз чиройли бўлиб, чаман - чаман гуллайди. Келинг, бугунги машғулотда, худди шундай гуллаган дарахтларнинг новдасини биз ҳам тайёрлашни ўрганамиз. Биз сизлар билан гуллаган шафтоли новдасини ясаймиз. Керакли ашёлар олдингиздаги столга қўйилган. Новдани олдимизга қўйиб, пушти рангдаги ғижим қоғоздан квадрат шаклини қирқиб оламиз. Уни иккига, сўнг тўртга буклаймиз, натижада кичик квадратчалар ҳосил бўлади. Букланган квадратчанинг бир учини ушлаб туриб, очиқ учларини қайчи билан ярим доира тарзида қирқиб оламиз, букланган коғозни очамиз. Ўртасига бармоғимизни қўйиб турсак гул баргининг чети қайрилиб қолади. Чуқур жойининг орқасига озгина елим суртилади. Сўнгра новдага елимланади. Гулларни елимлашдан олдин тарбиячи болаларга шафтоли гули новдада қандай жойлашганлигини эслатиб, табиий ҳолига ўхшатиб, кетма-кет елимлаш кераклиги уқтирилади. Гул япроғини қирқа олмаган бола­ларга якка ҳолда ёрдам кўрсатилади. Машғулот давомида болаларнинг яхши ишлари рағбатлантирилиб борилади.
Тайёр новдаларни солиб қўйиш учун хар бир столга, болаларнинг ўзлари ясаган гулдонлар қўйиб чиқилади. Болалар гуллаган новдани гулдонларга солиб қўядилар.
Тарбиячи: болалар‚ қаранг, сиз ясаган гуллаб турган шафтоли новдачаларингиз хонамизни яна ҳам чиройли қилиб юборди.
Болаларни ўз ишлари натижасидан завқланишга ўргатиб борилади. Шу тариқа машғулот якунланади.

Aim.uz