Ғолиблар қонуни умрингнинг сўнгида қандай яшашни истасанг, шу бугуноқ шундай яшашни бошла

МАОШИНГИЗ ОША БОРГАН САЙИН ПУЛ ТЎПЛАНГ
Даромадларингиз ошган сайин ҳаётингиз даражаси ҳам оша боришини пайқаган бўлсангиз керак. Бироқ бу ҳолда сиз қанча кўп ишлаганингиз сайин каптиталингизни ўсмаётгани кузатилмаслиги керак. Бу ерда ҳам оддий усулни қўллаш мумкин.
Маошингиз ошиши билан унинг эллик фоизини тўпланиб бораётган ҳисоб рақамга ўтказишингиз керак. Сиз аввалги маошга ўрганиб қолганингиз туфайли бу сизга умуман таъсир қилмайди. Сиз маошингизнинг «ярим баробар» ошганига осонгина кўникасиз. Бу ҳолатда сизнинг омонатингиз янада тезроқ кўпая бошлайди ва белни янада маҳкамроқ сиқиш учун ҳожат қолмайди.
СИЗ ХУСУСИЙ ТАДБИРКОР БЎЛСАНГИЗ...
Ишбилармонлар ва эркин касб эгалари олдиндан маълум бир суммадаги пулларни иқтисод қила олишмаслиги, чунки уларнинг даромадлари миқдори доим юқорилаб-тушиб туришидан нолишади. Бундай нуқтаи назар нафақат нотўғри, балки хавфли ҳамдир. Бу сиз тадбиркорликнинг асосий молиявий қоидасидан бехабар эканлигингизни намойиш этади.
Сиз бир сиймонинг ўзида ҳам фирма раҳбари, ҳам хизматчиси бўлишингиз керак. Ролларнинг бу тариқа бўлиниши фақат хаёлий бўлмаслиги керак, бу бухгалтерия ҳисоботларида ҳам ўз аксини топиши лозим. Бунинг учун сизга иккита ҳисоб керак бўлади: фирма ҳисоби ва ўз шахсий ҳисобингиз. Бироқ энг асосийси — сиз ўзингизни фирманинг оддий бир ходими сифатида қатъий қабул қилишингиз керак.
Агар фирма даромад келтирса у хусусий шахс сифатида сизга эмас, фирмага тегишли. Сиз ҳам фирманинг исталган ходимидек, маошга яшашингиз керак-ку. Ҳар ойнинг охирида олдиндан белгиланган суммани фирма ҳисоб рақамидан ўз ҳисоб рақамингизга ўтказинг. Шу йўл билан фирма даромадларидаги тебранишлар сизнинг капитал йиғишингиз ва молиявий режалаштиришингизга таъсир қилмайди.
Ўзингизга ҳаддан ташқари катта маош белгиламанг. Унинг даражаси ўтган йилги даромадларингизнинг қирқ беш фоизидан ортиқ бўлмаслиги керак. Ахир сиз ҳали солиқ тўлашингиз, ишлаб чиқаришга сармоя киритишингиз ва заҳира жамғармасига пул ажратишингиз ҳам керак. Шу сабабли бу ҳолатда сиз ходим эмас, хусусий тадбиркордек фикр юритишингиз керак. Ўзингизнинг шахсий эҳтиёжларингиз фирманинг фаровонлигига путур етказишига йўл қўйманг.