Farmasevtikada boshqaruv fanidan o‘quv-uslubiy majmua

Tekshirish o‘tkazish shartlari.
Xo‘jalik yurituvchi sub’ekt Nazorat organlari faoliyatini muvofiqlashtiruvchi Respublika kengashi yoki uning tegishli hududiy bo‘linmasidan uni tekshirishga aloqador ma’lumotlar (rejalashtirilgan tekshirish sanasi, turi, nazorat organi nomi va boshqalar)ni olishga haqlidir.
Tekshiruvni o‘tkazish faqat tegishli nazorat organlari tomonidan amalga oshiriladigan attestatsiya natijalari bo‘yicha baholangan va tekshirish huquqini beruvchi belgilangan namunadagi maxsus guvohnomalarga ega bo‘lgan mansabdor shaxslarga ruxsat etiladi.
Xo‘jalik yurituvchi sub’ektlar faoliyatini tekshirish muddati 30 kalendar kundan oshib ketishi mumkin emas. Istisno hollarida bu muddat Nazorat organlari faoliyatini muvofiqlashtiruvchi Respublika kengashi qaroriga ko‘ra uzaytirilishi mumkin.
Tekshirishni amalga oshiruvchi mansabdor shaxslar tek­shirish boshlanishidan oldin xo‘jalik yurituvchi sub’ekt rahbarini tekshirish maqsadi va shartlari bilan tanishtirishi, qonunchilik bilan belgilangan xujjat­larni taqdim etishi lozim. Shundan so‘ng xo‘jalik yurituvchi sub’ekt rahbari nazorat organi­ning mansabdor shaxsiga “Tekshirishlarni ro‘yxatga olish ki­tobi”ni tegishli ustunlarini to‘ldirish uchun taqdim etadi.
“Tekshirishlarni ro‘yxatga olish kitobi” mulkchilik shaklidan qat’iy nazar barcha xo‘jalik yurituvchi sub’ektlari tomoni­dan yuritiladi. Bu kitob raqamlangan va va­raqlar soni ko‘rsatilib, xo‘jalik yurituvchi sub’ektning muhri bilan tasdiqlan­gan bo‘lishi kerak. “Tekshirishlarni ro‘yxatga olish kitobi”ni to‘ldirish belgilangan qoidalarga muvofiq amalga oshiriladi.
Nazorat organining vakolatli shaxsi “Tekshirishlarni ro‘y­xatga olish kitobi”ni to‘ldirishdan bosh tortsa, xo‘jalik yuri­tuvchi sub’ekt tekshirish o‘tkazishga yo‘l qo‘ymaslikka haqlidir.
Nazorat organlari tekshirishni nazorat organi rahbari tomonidan tasdiqlangan tekshirish o‘tkazish rejasiga muvofiq amalga oshiradi. Tekshirish uni o‘tkazish rejasi yoki nazorat organi vakolatlari doirasidan tashqariga chiqmasligi lozim¹⁸.