Ғаниев Достон Абдисаттор ўғли

Ижтимоий муаммо ва ижтимоий сиёсатни таҳлил этиш. Ижтимоий муаммоларни ҳал қилиш ва мавжуд ижтимоий сиёсатни қайта кўриб чиқиш ёки янгисини бунёд этишда биринчи қадам муаммонинг характерини аниқ тушунишга эришишдир. Ижтимоий тенденцияларни таҳлил этиш, маълумотларни тўплаб умумлаштириш ҳамда олинган маълумотларни аниқ тушуниш зарур. Шуларга ўхшаш дастлабки ишлар олиб борилмаса, ўзгаришларни амалга ошириш бўйича муваффақиятга эришиш эҳтимоли жуда кам бўлади. Бундай таҳлилда қуйидаги одимлар изчиллиги қўлланилади 1) таҳлил мезонларини ишлаб чиқиш; 2) ўтказилаётган ижтимоий сиёсатнинг мижозларга ва ижтимоий муаммоларнинг ривожланишига кўрсатадиган таъсирини аниқлаш; 3) мазкур муаммога таъсир кўрсатадиган ижтимоий қадриятлар ва ишонч-эътиқодларни таҳлил қилиш.
Жамоатчилик эътиборини йўналтириш. Шаклланган ижтимоий сиёсат тушунчаларини конкрет ўзгаришларни амалга ошириш бўйича саъй-ҳаракатларга айлантириш манфаатдор кишилар, гуруҳлар ва ташкилотларнинг куч-қувватини тўплаб, исталган ўзгаришларни излашга йўналтиришни талаб қилади. Бу мижозларга, манфаатдор гуруҳларга ва гуманитар ташкилотларга муаммога мурожаат қилиш йўлларини излаб топишга ёрдам беришдан иборат бўлиши мумкин. Бундай хатти-ҳаракатга жалб қилиш барча манфаатдор гуруҳлар учун йиғилишлар ташкил қилиб, гуруҳларга муаммоларни тушунишларини чуқурлаштиришларига ёрдам берувчи вазиятнинг дастлабки таълимини тақдим этиш, эришиладиган мақсадларни белгилаш йўли билан ўзгаришлар бўйича саъй-ҳаракатларни ташаббус қилиб чиқишни ўз ичига олиши мумкин. Бу эса гуруҳларга хатти-ҳаракатлар стратегиясини кўриб чиқиш ва танлашга, мазкур масалалар бўйича қарор қилишга ваколатли бўлган ташкилотларни белгилашга, шунингдек, тегишли ташкилотлар томонидан зарур хатти-ҳаракатларни танлаш ва қарор қилишга таъсир кўрсатишга имкон берадиган чора–тадбирларни режалаштириш ва режани амалга оширишга ёрдам кўрсатиш бўлиши мумкин.
Жамоавий манфаатларни ҳимоя қилиш. Ижтимоий ўзгаришлар агенти сифатида ижтимоий иш ходими кўпинча ўхшаш муаммоларга эга бўлган мижоз гуруҳлари манфаатларининг ҳимоячиси вазифасини бажаради. Одатда жамоавий манфаатларни ҳимоя қилиш инсон гуруҳларига ўз фуқаролик ҳуқуқларини рўёбга чиқаришга ёки ушбу ҳуқуқлардан келиб чиқадиган устунлик ёки имтиёзларга эга бўлишга тўсқинлик қиладиган тўсиқларни бартараф қилишга йўналтирилган хатти-ҳаракатларни назарда тутади. Вайсман, Эпштейн ва Сэйвиджлар (1983) жамоавий манфаатларни ҳимоя қилиш намуналарини, шу жумладан, «ҳуқуқлари поймол қилинган озчиликлар, кам таъминланганлар, ногиронлар номидан иш олиб бориш, у ёки бу хизматлардан ким фойдаланиш ҳуқуқига эга эканлиги бўйича қоидалар шарҳланишида ўзгаришларга эришишга қаратилган ишларни олиб бориш, шунингдек, мавжуд дастурий тузилмалар ва қонунларни ислоҳ этиш бўйича иш олиб боришни» кўрсатиб берганлар.