Ey, farzand

JUMA KUNINING ODOBLARI

Ey, farzand!

Juma kuni liboslarning eng yangisini kiyish zarur. Chunki juma mo‘minlarning bayrami. Yangi libosi bo‘lmagan toza libosini kiyib o‘sha kunni kutib oladi. Xushbo‘ylar sepish juma kunining odobidir. Farishtalar xushbo‘y hidlarni sevadilar. Juma kuni har doim zikr va tasbehda davomli bo‘lish, ayniqsa, juma namoziga borayotganda bunga ahamiyat berish zarur. Bu haqda Rasululloh (s.a.v.) marhamat etadilar:

«Juma namozi o‘qish uchun chiqqanning har odimiga o‘n savob beriladi. Keyingi jumagacha kechalarni zikr, kunduzlarni ro‘za bilan o‘tkazganchalik savob yoziladi».

Payg‘ambarimiz (s.a.v.) boshqa bir hadisi shariflarida shunday deydilar:

«Juma kunini va juma namozini odob va arkoni bilan o‘tkazgan kishiga yigirma yillik ibodat savobi beriladi».

Yana Rasululloh (s.a.v.) shunday marhamat etadilar:

«Bir kishi juma namozi uchun masjidga borib, juma xutbasi eshitadigan joyda o‘tirib, xatib minbardan tushguncha, dunyoviy so‘zlar aytmay tinglab o‘tirsa, Alloh taolo u kishiga beradigan savobdan ustunroq bir savob bo‘lmaydi, Xutba o‘qilayotganda yonidagi kishi bilan suhbatlashganning namozi buziladi. O’sha kishiga ikki gunoh yoziladi. Xutba eshitilmaydigan joyda suhbatlashgan kishi esa bir gunoh yoziladi. Shu tariqa bir kishining juma namozi botil bo‘ladi».

Ey, farzand!

Juma namozi uchun masjidga keyinroq kelgan kishi bo‘sh joyga o‘tirishi kerak.

Namozxonlarni bezovta qilib, oldinga o‘tmaslik lozim. Oldingi safda o‘tirganni istagan namozxon masjidga ertaroq kelishi kerak.

Rasululloh (s.a.v) shunday deydilar:

«Masjidda saf hatlab ilgari o‘tuvchilarni qiyomat kunida jahannam ustiga ko‘prik qiladilar». Bundan Allohning O’zi asrasin!