«Эврилиш» кейин уйғонилмайдиган қўрқинчли туш. Асаргa обдан сингдирилган кўпгина ҳаётий чизгилар воқелик ва туш қоришмаси эффектини яратади. Сатрлар остида: «Бундай ҳол ҳар ким билан хам юз бериши мумкин» маъноси уқилади

«Эврилиш» кейин уйғонилмайдиган қўрқинчли туш. Асаргa обдан сингдирилган кўпгина ҳаётий чизгилар воқелик ва туш қоришмаси эффектини яратади. Сатрлар остида: «Бундай ҳол ҳар ким билан хам юз бериши мумкин» маъноси уқилади. «Эврилиш» – Франц Кафканинг мўъжаз нодир асаридир . У адабиётдаги экзистенциализмнинг ёрқин намунаси ҳисобланади. Бу ҳикояда ёзувчи оғир ҳаётининг турли жиҳатлари ўз ифодасини топган. «Эврилиш» – фожиавий ёлғизлик, энг яқин инсонлар билан муносабатлар мудҳиш хотима топганлиги ҳақида­ги ҳикоядир. Асар юзаки қарагандек, асло одамнинг фантастик, сюрреалистик тарзда хашаротга (қўнғизга) айланиб қолгани ҳақида эмас. Балки одамларнинг эврилиши тўғрисидадир. Зеро, Грегор Замза атрофидагиларнинг инсон каби фикр юритадиган, фантастик тарзда беҳол бўлиб қ олган ҳашаротга қараганда ҳам одамларга ўхшашлик жойи кам. Ф.Кафканинг «Эврилиш»и одамларнинг бир-бирларини ту- шунмасликларининг фожиасидир. Одамнинг ҳашаротга эврили­ши инсонларнинг, яна энг қадрдонларнинг гўёки мутлақо бошқа-бошқа мавжудотлардек бир-бирларини тушуна олмасликларини ўзига хос тасвирлаш учун ишлатилган услубдир.
Ижодкорнинг барча асарлари орасида «Эврилиш»ни энг яхшиси дейиш мумкин. Бошқа асарлардан фарқли равишда унда бетиним давом этадиган узундан-узоқ, баъзида зерикарли мулоқотлар, қайтариш ва чалкашликлар йўқ. «Эврилиш» том маъ­нода ипидан-игнасигача аниқ, ҳисоблаб чиқилган, ҳар бир сўз эса тарозуда тортилган асар. «Эврилиш» жаҳон ҳикоячилиги тарихида фавқулодда ҳодиса бўлиб, ҳикоянавислик маҳоратини ёзувчи улкан чўққига кўтарган.
Франц Кафка Грегор Замза образига ўз қалбининг бир бўлагини сингдириб, адабий анъаналар руҳини услубига хос тарзда акс эттириб, уни китобхонлар юрагида ҳам жонлантиришга умид қилган. Т. Манн: «Кафка асарларини жаҳон адабиёти томонидан яра­тилган ҳамма нарсалар орасида мутолаа учун энг муносиблари қаторига қўшиш керак», деб ёзган.