Ёшларга оид давлат сиёсатини маҳаллабай жорий этиш механизмлари

«Ёшлар дафтари»га киритилган моддий аҳволи қийин ёшларга бир марталик моддий ёрдам кўрсатиш
БҲМнинг 4 бараваригача
Бир марта бериладиган моддий ёрдам тўлиқ давлат таъминотида бўлмаган, ҳаётий мураккаб вазиятга тушган ёшга, биринчи навбатда, қуйидагиларга тайинланади:

• боқувчисини йўқотган ва ота-она қарамоғидан маҳрум бўлган ижтимоий ҳимояга муҳтож ёшларга;
• ўзгалар парваришига муҳтож бўлган ишга лаёқатсиз ёшларга;
• I ва II гуруҳ ногирони бўлган ёшларга;
• қарамоғида ногирон бола бўлган ёш оила (эр-хотиннинг бири)га;
• ота-оналардан бири I ёки II гуруҳ ногирони бўлган, иккинчиси эса иш фаолиятини тўхтатган ҳолда беморга қарашга мажбур бўлган ёки иккала ота-она ҳам I ёки II гуруҳ ногирони бўлган ёшларга;
• табиий офатлар, ҳалокатлар, ёнғинлар ва бошқа фавқулодда вазиятлар оқибатида ҳаётига, соғлиғига, мулкига зарар етган ёшларга.

Мураккаб ҳаётий вазиятга тушган бошқа тоифадаги ёшларга, асослантирувчи сабаблари мавжуд бўлганда, секторлар раҳбарларининг хулосаларига асосан Васийлик Кенгаши қарори билан бир марталик моддий ёрдам берилиши мумкин.

«Ёшлар дафтари»га киритилган ёшларни тадбиркорлик, касб-ҳунар, ҳайдовчилик ва қайта тайёрлов курсларида ўқитиш харажатларини қоплаш
БҲМнинг 4, 8, 12 бараваригача
Нодавлат касб-ҳунарга ўқитиш марказларига тадбиркорликка ва касб-ҳунарга ўқитиш учун сарфланган харажатларнинг 75 фоизигача қисми «Ёшлар дафтари» жамғармаси маблағлари ҳисобидан қоплаб берилади:

• ёшларни тадбиркорликка ўқитиш харажатларининг ҳар бир битирувчига БҲМнинг 4 бараваридан ортиқ бўлмаган қисми;
• касб-ҳунарга ва ҳайдовчилик курсларида ўқитиш учун сарфланган харажатларнинг бир ойгача, бир ойдан икки ойгача, икки ойдан ортиқ муддатли ўқув курслари учун тегишлича БҲМнинг 4, 8, 12 бараваридан кўп бўлмаган қисми қоплаб берилади.

Хусусий корхона ва ташкилотларга ишга қабул қилинган ҳамда фаолият бошлаганига олти ойдан ошмаган «Ёшлар дафтари»га киритилган ёшларни қайта тайёрлов курсларида ўқитиш билан боғлиқ бўлган харажатларнинг БҲМнинг 4 бараваригача бўлган қисми мазкур хусусий корхона ва ташкилотларга Васийлик кенгаши қарорига асосан «Ёшлар дафтари» жамғармаси маблағлари ҳисобидан компенсация қилиниши мумкин.