Электр энергиясидан фойдаланиш қоидалари 1-боб. Умумий қоидалар

13-боб. Электр энергияси истеъмолчиларининг тариф гуруҳлари

149. Барча электр энергияси истеъмолчилари тўрт тариф гуруҳига бўлинади

(I, II, III ва IV).
150. I тариф гуруҳига 750 кВА ва ундан ортиқ қувватган уланган ҳамда электр энергияси учун табақалаштирилган тариф бўйича ҳисоб-китоб қиладиган истеъмолчилар киради, Давлат бюджетидан молиялаштириладиган бюджет ташкилотлари, фермер хўжаликлари ва сув истеъмолчилари уюшмаларининг насос станциялари, шунингдек, насос станциялари бундан мустасно.
151. II тариф гуруҳига қуйидагилар киради:
электр энергияси учун бир ставкали тариф бўйича ҳисоб-китоб қиладиган истеъмолчилар, маиший истеъмолчилардан ташқари;
“Ўзбекэнерго” АЖ ва “Ўзбекгидроэнерго” АЖ таркибига кирадиган, ҳудудий электр таъминоти корхоналари, шу жумладан ҳудудий электр тармоқлари корхоналаридан электр қуввати оладиган корхона ва ташкилотларнинг, шунингдек, электр энергияси ишлаб чиқарувчи корхоналарнинг ушбу корхоналар ҳудудидан ташқарида алоҳида жойлашган объектларининг хўжалик эҳтиёжлари.
Бунда “Ўзбекэнерго” АЖ ва “Ўзбекгидроэнерго” АЖ таркибига кирадиган ҳамда электр энергияси ишлаб чиқарувчи корхоналар томонидан хўжалик эҳтиёжлари учун ўзига тегишли тармоқларда электр энергияси ишлаб чиқариш бўйича фойдаланилган электр энергияси амалдаги таннарх бўйича ҳисоб-китоб қилинади.
152. III тариф гуруҳига маиший истеъмолчилар киради. Ушбу тариф гуруҳи бўйича аҳоли томонидан турмуш эҳтиёжлари учун уй-жойларда, хонадонларда, ётоқхоналарда, ёрдамчи хўжаликларда, шахсий фойдаланиладиган томорқа боғ объектларида, шу жумладан боғ ширкатлари ва дала ҳовлилар суғориш насослари, шахсий автомашиналар учун гаражларда сарфланадиган электр энергияси ҳақи ток қабул қилгичларнинг қуввати ҳамда ҳисобга олиш асбобларининг ўрнатилган жойидан қатъий назар, тўланади.
Шаҳарсозлик нормалари ва қоидаларига мувофиқ овқат тайёрлаш учун электр плиталар билан жиҳозланган ўн қаватдан баланд турар-жойлар ва ётоқхоналарда яшайдиган маиший истеъмолчилар томонидан фойдаланиладиган электр энергияси учун тўловлар ушбу тариф гуруҳига кирадиган амалдаги тарифнинг 50 фоизи миқдорида амалга оширилади.
153. IV тариф гуруҳи бўйича I ва II тариф гуруҳлари истеъмолчилари томонидан технологик мақсадда электр иситиш, шунингдек, биноларни иситиш, иссиқ сув таъминоти ва овқат тайёрлаш учун сарфланадиган электр энергиясининг ҳажми тўланади.