Экология ҳуқуқи

Ушбу вазиятни Ўзбекистон Республикасининг норматив-ҳуқуқий ҳужжатлари асосида таҳлил қилинг ва ҳуқуқий баҳо беринг.
Р.Кенжаев
6.	Фарғона вилояти, Бешариқ тумани, Бешбола қишлоғининг Мустақиллик маҳалласида жойлашган ғишт ишлаб чиқарувчи “Озод файз” (газ) ва “Акром сервис” (кўмир) цехлари 2019 йил январь ойидан бошлаб ўз фаолиятини олиб бормоқда. Ўтган вақт ичида корхоналар мавжуд жиҳозлар билан янгиланиб, замонавий технологиялар асосида фаолият юритиб келмоқда. 2020 йил май ойида Бешариқ туман Прокуратурасига шу туманнинг Мустақиллик маҳалласида яшовчи фуқаро М.Саидовдан юқоридаги цехлар фаолияти устидан шикоят хати келиб тушди. Шикоятда қайд этилишича, фуқаронинг хонадонидан 100 метр ҳамда Бешариқ саноат касб-ҳунар коллежидан эса атиги 75 метр нарида жойлашган ғишт ишлаб чиқарувчи ушбу цехлар ишлаб чиқариш жараёнида атмосферага зарарли чанг чиқариб, аҳолини соғлиғига жиддий хавф солаётганлигини ва шу сабабли ушбу цехлар фаолиятини тўхтатиш лозимлигини билдирган. Туман прокуратураси Ўзбекистон Республикаси Давлат экология қўмитасининг Фарғона вилояти бошқармаси ва Фарғона вилояти Давлат санитария-эпидемиология назорати марказига ушбу масалага ойдинлик киритиш мақсадида мурожаат қилди. Мустақиллик маҳалласида ўтказилган ўрганишлар натижасида, ғишт ишлаб чиқариш цехлари билан аҳоли хонадонлари ўртасидаги санитария ҳимоя масофаси сақланилмагани аниқланди. Шунингдек Мустақиллик маҳалласидаги ғишт ишлаб чиқариш цехлари атрофидаги экинзорлардан, санитария ҳимоя ҳудудларидан номаълум шахслар томонидан тупроқ қазиб олиниши оқибатида, юқори кучланишли электр таянч симёғочлари атрофидан катта ҳажмда тупроқ кўчириб олиниб, кучли шамол ёки ёмғирда таянчларнинг қулаб тушишига, техноген фалокат юз беришига сабаб бўладиган вазият вужудга келтирилгани аниқланди. Давлат экология қўмитасининг Фарғона вилояти бошқармаси томонидан атмосферага зарарли таъсир кўрсатганлигини аниқлаш мақсадида ушбу ғишт ишлаб чиқариш цехларида зудлик билан давлат экологик экспертизаси ўтказилиб, 10 кун муддатда экспертиза хулосасини тақдим қилиш лозимлиги таъкидланди.