Э. ҚОсимов, М. Aкбaров пaрдозбоп қурилиш aшёлaри

Ялтироқлиги кўз билан чамалаб аниқланади. Ялтироқлик — юқори, ўртача, ярим жилосиз ва жилосиз даражаларга бўлинади.
Лакларнинг силлиқланиш хусусияти стандартда кўрсатилган муддатда қотгандан кейин аниқланади. Силлиқлаш учун бир парча сукнони пемза тош кукуни ва сувга тегизиб лак суртилган юза ишқаланади.
Лак суртилган юза силлиқлангандан кейин текис ва жилосиз бўлса, бундай лак қониқарли ҳисобланади. Aгар силлиқлаш вақтида текислаб бўлмайдиган заррачалар қолса ва силлиқлаш пайтида лак юзаси юмшаса, бундай лакнинг силлиқланиши қониқарсиз деб ҳисобланади.
Полировкаланиш хусусияти белгиланган муддатларда текшириб кўрилади. Бир неча томчи хом зиғир мойи томизилган ва вино спиртига ҳўлланган пахта тампони билан полировка қилинади. Полировка қилингандан кейин текис, чиройли ялтироқ юза ҳосил бўлиши керак.
Лак парданинг намга чидамлилигини текшириб кўриш учун синалаётган лак суртилган пўлат пластинканинг 2/3 қисми сувга ботирилади ва ғадир-будирлик, пуфакчалар ва кўчган жойлар пайдо бўлганига қараб билиб олинади.
Лак парданинг қаттиқлиги тажрибахонада, маятникли асбоб ёрдамида текшириб кўрилади. Бу усул лак парда юзасига ўрнатилган маятник тебранишининг сўниш вақтини шиша пластинка устига ўрнатилган шу маятник тебранишининг сўниш вақтига нисбатини топишга асосланган.
Лак пардаларнинг зарбга пишиқлиги тажрибахонада асбоб ёрдамида аниқланади. Синаш усули 1 кг келадиган юк лок парда устига (унга шикаст етказилмаган ҳолда) қандай максимал баландликдан ташланишини топишга асосланган.


Силлиқлаш ашёлари


Натурал пемза — ер остидан отилиб чиққан тоғ жинсидир. Пемза шпаклёвка қилинган ва бўялган юзаларни қуруқлигича ва намлаб силлиқлаш (пемзалаш) учун ишлатилади. Пемзанинг сифати унинг бир жинсли эканлиги билан белгиланади. Қаттиқ ва йирик қум доналари пемзага аралашган бўлса, силлиқланаётган юзани тирнаб юборади.
Сунъий пемза — қумдан ёки майдаланган тупроқдан тайёрланади. Заррачаларининг майда-йириклигига қараб сунъий пемза йирик донли ва майда донли бўлади.