Одамда реабсорбция миқдорини аниқлаш. Бирор модданинг реабсорбцияланадиган миқдорини аниқлаш учун уни венага юбориб, қондаги ҳамда сийдикдаги концентрациясини билиш ва ажралиб чиққан сийдик миқдорини ўлчаш мумкин. Шу билан бир вақтда коптокчадаги фильтрация миқдорини аниқлаш учун инулин ҳам юборилади.
Табиий шароитда қон ва сийдикда бўладиган моддалар (масалан, мочевина) реабсорбциясини аниқлаш учун уларни қонга юбориш зарур эмас, чунки бунда текширилаётган модданинг қон плазмасидаги ва сийдикдаги миқдорини, шунингдек ажралиб чиққан сийдикнинг умумий ҳажмини аниқлаш кифоя.
Глюкозанинг максимал реабсорбция миқдорини аниқлаш учун қонга глюкоза юбориш ва унинг қондаги концентрациясини сийдикда пайдо бўладиган даражагача ошириш лозим. Бунда қуйидагича ҳисоб қилинади.
1 минутда фильтратга ўтган глюкоза миқдори унинг қондаги концентрациясининг 1 минутдаги фильтрат ҳажми (Ғ) га кўпайтирилганига, яъни Ғ · Рg га тенг. Каналчаларда реабсорбциялангаи глюкоза миқдори (R) фильтратга ўтган глюкоза миқдори билан сийдикка ўтган глюкоза миқдори ўртасидаги айирмага тенг, яъни R=F·Pg-V·Wgбунда Wg—глюкозанинг сийдикдаги концентрацияси, V- эса — буйраклардан 1 мииутда чиқадиган дефинитив сийдикнинг миқдори.
Юқорида айтилганидек, Рg 160—180 мг % дан кам бўлса, сийдикда глюкоза бўлмайди, яъни V • Wg=0 ; демак, глюкоза тўла реабсорбцияланар экан (R=Ғ- Рg). Реабсорбция механизми. Турли моддаларнинг қайта сўрилиш (реабсорбция) механизми турлича. Масалан, натрий, глюкоза, аминокислоталар ва бошқа баъзи моддалар актив ҳаёт фаолияти процесслари натижасида сўрилади. Сув, шунингдек хлоридлар эса пассив йўл билан, яъни диффузия ва осмос қонунлари асосида сўрилади.
Баъзи моддаларнинг актив ўтиши буйрагини ажратиб қилинган тажрибаларда исбот этилган. Буйракни цианидлар билан заҳарлаш (натижада буйракдаги оксидланиш процесслари фалажланади), шунингдек буйракни совутиш (бу, буйракда моддалар алмашинувини сусайтиради) реабсорбция процессларини камайтиради ва чиқадиган сийдик миқдорини жуда ошириб юборади. Буйрак совутилганда қон томирларининг торайиши ва фильтрация камайишига қарамай, сийдикнинг кўп чиқиши диққатга сазовор.
Буйрак каналчаларидаги цилиндрик эпителийнинг актив фаолияти туфайли моддалар уларнинг концентрацион градиентига қарши йўналишда, яъни моддаларнинг қондаги концентрацияси уларнинг каналча суюқлигидаги концентрациясига тенг ёки ортиқ бўлганда ҳам сўрилиши мумкин.
Л. Г. Гинецинский ва бошқалар кўрсатиб берганидек каҳрабо кислотасининг дегидрогеназа ферменти натрий ионларининг реабсорбциясида муҳим роль ўйнайди. Натрий ионларини ўтказадиган барча тўқималарда шу фермент мавжуд. Бу фермент активлиги симоб пре-паратлари билан сўндирилганда натрий тузлари сўрилмайди.
Каналчалар эпителийси орқали натрий ионларининг актив ўтиши билан хлор ионлари ҳам ўтади. Бунга электростатик ўзаро таъсир кучлари сабаб бўлади: мусбат зарядли натрий ионлари манфий зарядли хлор ионларини ва бошқа баъзи анионларни эргаштириб кетади.
Каналчаларда сув жуда кўп сўрилади. Бу процесс пассив йўл билан, яъни диффузия ва осмос қонунлари асосида рўй беради. Бирламчи сийдикдан буйракларнинг тўқима суюқлигига ва қонга глюкоза, натрий, калий, кальций ва бошқа моддаларнинг сўрилиши тўқима суюқлигининг осмотик босимини оширади ва каналчалардаги сийдикнинг осмотик босимини камайтиради. Каналчалардаги сийдик тўқима суюқлигига нисбатан гипотоник бўлиб қолади. Осмотик босимлар фарқ қилганидан, сув бирламчи сийдикдан тўқима суюқлигига ва қонга ўтади. Бу пассив процесс органик ва анорганик бирикмаларнинг актив ўтишига параллел равишда боради.
Сув ўтиши биринчи тартибдаги бурама каналчаларда мавжуд сийдикнинг осмотик босимини тўқима суюқлиғи билан қоннинг осмотик босимига бараварлаштиради. Шундай қилиб, тузлар кўп сўрилишига қарамай, бурама каналчалардаги сийдик қонга изотоник бўлиб қолаверади. Генле қовузлоғида махсус механизм — буриб тескари оқизадиган система ишлаб турганидан сийдикнинг изотониклиги бузилади.
