Диссертация Илмий раҳбар: проф. Г. Х. Ибрагимова Тошкент 2013 Магистрлик диссетацияси иши "Иқтисодий педагогика"

125

КИРИШ
Мавзунинг долзарблиги.
Бозор ислоҳотлари амалга оширилаётган шароитда мустақил фикрловчи ёшларнинг мавжудлиги давр тақозоси ҳисобланиб, ўз шахсий дунёқарашига эга бўлган инсонларгина жамият тараққиётини таъминлашга хизмат қиладиган кўплаб лойиҳаларни ишлаб чиқишга қодир эканлигини кўрсатади. Шундай қилиб, иқтисодиётни эркинлаштириш, тадбиркорлик фаолиятини ривожлантириш, мулкдорлар синфини шакллантириш, ерга, мулкка эгалик ҳиссини таркиб топтириш орқали уларда иқтисодий билим ва иқтисодий фикр юритишнинг ҳам эркинлашувига эришиш мумкин. Яъни, иқтисодий ҳаётни эркинлаштиришнинг муваффақияти ҳар бир фуқаронинг мулкка бўлган муносабатини тубдан ўзгартириб, тадбиркорлик фаолияти мотивациясини янада кучайтиради. ¹
Мамлакатимизда бозор иқтисодиёти механизмларининг такомиллашуви натижасида хусусий мулкчиликнинг барча шакллари ривожланиб, тадбиркорлик фаолиятига кенг йўл очилди. Иқтисодиётнинг эркинлаштирилиши, тадбиркорлик фаолиятининг янгиланиши одамларнинг хусусий мулкчилик ва меҳнатга бўлган муносабатларини тубдан ўзгартириб юборди. Кичик бизнес(жумладан, оилавий бизнес), фермерлик ҳаракати, қўшма корхоналарда хусусий тадбиркорликнинг самарали усулларини жорий этиш, ушбу фаолиятга имкон берувчи шахс сифатларини тарбиялаш, инсонлар тафаккурида янгича қарашларни шакллантириш педагогика-психологиянинг муҳим масалаларидан ҳисобланган тадбиркорлик муаммосини изчил асосда ўрганишни тақозо этади.
Республикамиз Президенти И.Каримов томонидан “Иқтисодиётни эркинлаштириш ва жаҳон иқтисодий ҳамжамиятига қўшилиш, бозор муносабатларининг қарор топиши ва мулкдорлар синфининг шаклланиши” дастурининг бажарилишини мувофиқлаштирувчи ҳукумат комиссияси йиғилишида қўйган вазифаларнинг мазмунидан келиб чиқади.
Бундан кўриниб турибдики, фикри соғлом, тафаккури замонавий, Ватан, юрт деган туйғу билан яшайдиган, ўз юрт ива халқи манфаатлари учун жонини аямайдиган фидоий ёш кадрларни тайёрлаб бериш – бугунги куннинг долзарб вазифасидир.²
Ўзбекистон Республикаси мустақиллигининг дастлабки кунлариданоқ жамиятнинг маънавий янгиланиши, жаҳон ҳамжамиятига интеграциялашуви жараёнида ҳуқуқий – демократик давлат ва фуқаролик жамияти қуришнинг ўзига хос йўлини танлади. Ушбу мақсадни рўёбга чиқаришда «Тараққиётнинг ўзбек модели» асос қилиб олинди. Бу давлат ва жамиятни демократлаштириш ва модернизациялаш кафолатини берадиган энг муҳим, устувор тамойилдир.³