Diktantlar

Eki dos
(Gúrriń)

Báhár kúnleriniń biri edi. Nurnazar menen Quwanısh mektepten qaytıp kiyatır. Ekewi de bir klasta oqıydı. Úyleri de qońsı turadı. Quwanıshtıń kózi birden Aman atanıń úyiniń aldındaǵı erte azan menen egilgen aǵash shúllikshelerine tústi:

-Anaǵan qara, Nurnazar, rogatkaǵa toǵanaq etiwge qayım eken,-dep suwırmaqshi bolıp juwırıp-aq bardı.
-Quwanısh, suwırma onı. Aman atam kórip qalsa ne deymiz? Ol bul aǵashlardı bizlerge saya, kóshege kórik berip tursın, dep egip qoyǵan joq pa?-dedi Nurnazar.
Óziniń nadurıs háreketine uyalıp qalǵan Quwanısh kósheni boylap juwırıp ketti. (Q. Matrazov, 77 sóz).

Bayan jobası:

1. 
   Balalar mektepten kiyatırıp neni kórdi?
   
2. 
   Quwanısh ne qılmaqshı boldı?
   
3. 
   Nurnazar onı qalay toqtattı?
   

T. Qayıpbergenov. Qaraqalpaqnama (Roman-esse). Nókis, “Qaraqalpaqstan” baspası. 1998, 14-bet.

Qaraqalpaqnama
(Roman-esse)
Ómirbek laqqı biytanıs elattıń kóshesinen qosıq aytıp ótip baratır eken, ózli-ózi oynap atırǵan balalar onı qorshalap, túe bastı qılıp oynay basladı. Ómirbektiń olarǵa kúshi jetpey demigip, óliwge jaqınlaǵanda, birden sumlıq oylaptı da:
-Balalar, ho anaw qońsı awılda bir saqıy adam kóringenge bir etekten alma úlestirip atır, túwesilmey turıp payıńızdı alıp qalıńlar, sonnan keyin meniń menen oynaysız,-depti.
Balalar soǵan inanıp, túrgelise sala qońsı awılǵa qaray shapqılasıp ketedi.
Jalǵız ózi qalǵan Ómirbek ústi-basınıń shańın qaǵınıp, alaqanın mańlayına sayaman qılıp, olardıń izinen bir maydan qarap turıptı da: “Haw, men ótirik aytqan sıyaqlı edim, eger ótirik bolsa, sonsha bala soyaqqa ketermedi? Men de barıp, bir etek alma alayın” dep balalardıń shańǵıtına ere juwırıp ketipti. (Roman-esse, 109 sóz).

Bayan jobası:

1. 
   Balalardıń Ómirbek penen oynawı.
   
2. 
   Balalardı alma úlestirip atır dep aldaw.
   
3. 
   Ózi aytqan ótirigine Ómirbektiń iseniwi.