Denov tadbirkorlik va pedagogika

KIRISH
Kurs ishi mavzusining dolzarbligi: Bozor iqtisodiyoti bilan bog‘liq jarayonlarni boshqarishda,milliy valyutaning xalqaro mavqeyini belgilashda va mamlakatning joriy hamda kelajakdagi iqtisodiy munosabatlari tizimida valyuta siyosati muhim rol o‘ynaydi. U iqtisodiy rivojlanish barqarorligini ta’minlash, ishsizlikning oldini olish va inflatsiyani jilovlash, to‘lov balansining aktivligini saqlab turishda makroiqtisodiy siyosatning muhim va ajralmas qismi hisoblanadi.
Oxirgi yillarda O‘zbekistonning tashqi iqtisodiy faoliyati jadal sur’atlar bilan rivojlanib bormoqda. Xorijiy sarmoyalar ishtirokida yangidan-yangi qo‘shma korxonalar vujudga kelib tashqi iqtisodiy faoliyatga qo‘shilmoqda. Tabiiyki, mazkur tashqi iqtisodiy munosabatlar ishtirokchilari xorijiy sheriklari oldidagi majburiyatlarini bajarish uchun xorijiy valyutani sotish yoki sotib olishga kuchli ehtiyoj sezmoqda. Mamlakat iqtisodiyotida muhim ahamiyatga ega bo‘lgan va tashqi iqtisodiy faoliyat shakllanishida asosiy o‘rinda turuvchi valyuta qonunchiligi doimo davomiy rivojlanish takomillashishda bo‘lmog‘i lozim.
Mamlakatimiz prezidenti I.A.Karimov ta’kidlaganidek, “Birjadan tashqari bozorni kengaytirish va rivojlantirish, tijoriy banklarning roli va ma’suliyatini oshirish hisobidan,milliy valyutamizni erkin muoamaladagi valyutaga to‘liq almashtirish(konvertatsiya qilish) masalasini yechish vaqti keldi. Bu tadbir mamlakatimizga kirib kelayotgan investitsiyalar hajmini oshirish garovi va kafolatidir”.
Shu bilan birga O‘zbekiston Respublikasi Prezidentining 02.09.2017- yildagi PF – 5177-son “Valyuta siyosatini liberallashtirish bo‘yicha birinchi navbatdagi chora-tadbirlar to‘g‘risida”¹ gi Farmoni qabul qilingan. Farmon, avvalo, amaldagi valyutani tartibga solish tizimini tubdan isloh qilish, valyuta siyosatini liberallashtirish, barcha tadbirkorlik subyektlariga tashqi savdo faoliyatini amalga oshirishda teng sharoitlar yaratishga qaratilgan. Valyuta kursi siyosatining tashqi savdoni rag‘batlantirishdagi rolining susayishi mahalliy ishlab chiqaruvchilar tovar va xizmatlari narxlarining tashqi va ichki bozordagi raqobatdoshligini pasaytirdi. Bozor tamoyillari asosida valyuta resurslari oqimining samaradorligini oshirish, xorijiy investitsiyalarni jalb qilish uchun qulay investitsiya va ishbilarmonlik muhitini shakllantirish, shuningdek, tashqi savdoda valyuta siyosatining rag‘batlantiruvchi rolini oshirish maqsadida milliy valyutaning xorijiy valyutaga nisbatan ayirboshlash kursi faqatgina valyuta birjasining banklararo elektron savdolarida valyutaga bo‘lgan talab va taklifdan kelib chiqqan holda belgilanadi.
Valyuta siyosatini isloh qilishga O‘zbekiston Respublikasini yanada rivojlantirish bo‘yicha Harakatlar strategiyasini amalga oshirishdagi birinchi zaruriy qadam sifatida qaralmoqda va islohotlarning muvaffaqiyati ko‘p jihatdan pul-kredit, soliq-budjet va iqtisodiy siyosatning boshqa sohalarida amalga oshirilayotgan sa’y-harakatlarning samarali muvofiqlashtirilishiga bog‘liq..
Shu bilan bir qatorda kurs ishida valyuta siyosati,uning vosita va instrumentlarining tashqi savdo, ya’ni eksport va importga qanday ta’sir ko‘rsatishi tahlili olib boriladi.