Демократик институтларни

Fuqarolik jamiyati va yoshlar tashkilotlari
O‘zA, Bahor Xidirova, 05.03.2011 18:32
Prezidentimiz Islom Karimovning Oliy Majlis palatalari qo‘shma majlisidagi “Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi” ma’ruzasida fuqarolik jamiyati institutlarini shakllantirish va rivojlantirish borasida qator dolzarb vazifalar belgilab berildi. Bu ulg‘ayib kelayotgan yoshlarni o‘z saflarida birlashtirgan nodavlat notijorat tashkilotlar zimmasiga ham alohida mas’uliyat yuklaydi.
O‘zbekiston “Kamolot” yoshlar ijtimoiy harakatining “Yetakchi” yoshlar markazida mamlakatimizda fuqarolik jamiyatini shakllantirishda yoshlar bilan ishlovchi nodavlat notijorat tashkilotlarning o‘rniga bag‘ishlab o‘tkazilgan davra suhbatida ana shu vazifalar haqida gap bordi. O‘zbekiston Adliya vazirligi va “Bunyodkor” yoshlar teleklubi hamkorligida tashkil etilgan tadbirda siyosatshunos, huquqshunos olimlar va mutaxassislar, tegishli davlat tashkilotlari, yoshlar bilan ishlaydigan nodavlat notijorat tashkilotlar vakillari, faol yoshlar, jurnalistlar ishtirok etdi.
“Kamolot” yoshlar ijtimoiy harakati markaziy kengashi raisining birinchi o‘rinbosari F.Muhammadjonova, O‘zbekiston Respublikasi Prezidenti huzuridagi Davlat va jamiyat qurilishi akademiyasi professori M.Qirg‘izboyev va boshqalar Prezidentimiz Islom Karimov rahnamoligida “Kuchli davlatdan – kuchli fuqarolik jamiyati sari” tamoyilining hayotga izchil tatbiq etilishi samarasida nodavlat notijorat tashkilotlarning shakllanishi va rivojlanishi uchun qulay muhit yaratilganini ta’kidladi. Ularning faoliyatini tartibga soluvchi mustahkam qonunchilik bazasi shakllantirildi. Bu jarayonda davlatning bosh islohotchi sifatida belgilanishi islohotlarning tizimli o‘tishida muhim omil bo‘layotir.
Hozir mamlakatimizda 5 mingdan ziyod nodavlat notijorat tashkiloti faoliyat yuritmoqda. Ular orasida yoshlar bilan ishlaydigan jamoat tuzilmalari ham talaygina.
Prezidentimiz Islom Karimov tomonidan ilgari surilgan Konsepsiyada bunday jamoat tuzilmalari faoliyatining huquqiy asoslarini yanada takomillashtirishga oid yangi qonunlar ishlab chiqish, mazkur yo‘nalishdagi mavjud qator qonunlarga tegishli o‘zgartirish va qo‘shimchalar kiritish belgilangan. Bu vazifalarni bajarishda jamoat tashkilotlarining ham faol ishtiroki muhim ahamiyatga ega.
Davra suhbatida yoshlar bilan ishlovchi nodavlat notijorat tashkilotlarning faoliyat samaradorligini yanada oshirishning muhim huquqiy va amaliy asoslari, yurtimizda olib borilayotgan demokratik islohotlarni kuchaytirishda yoshlarning faolligini yanada oshirish va fuqarolik pozitsiyasini kuchaytirish bilan bog‘liq dolzarb masalalar muhokama qilindi.