Dehqonova mahliyo shuhrat qizining

Ixtisoslik shifri va nomi:13.00.02 - ta’lim-tarbiya nazariyasi va metodikasi bo‘yicha falsafa doktori

Dissertatsiya ishi bajarilayotgan tarmog‘i: pedagogika.

Ilmiy maslahatchining familiyasi, ismi-sharifi, ilmiy darajasi va unvoni: pedagogika fanlari doktori, dotsent B.Sh.Shermuhammadov

Dissertatsiya ishi bajariladigan tashkilotning to‘liq nomi va elektron manzili: Farg‘ona davlat universiteti , e-mail: [e-mail]

Mavzuning dolzarbligi: Jahonda ta’lim tizimi natijalariga bo‘lgan talab hamda tamoyillarning o‘zgarishi pedagogik jarayonlarga innovatsion yondashuv va texnologiyalarni faol joriy etishni taqozo etmoqda. Ta’lim jarayoniga tatbiq etilayotgan innovatsiyalar samarasi o‘qituvchining kasbiy-pedagogik ijodkorligi xarakteri va uning shakllanganligi darajasiga bevosita bog‘liq. Zamonaviy o‘qitish tizimlarining amaliyotga joriy qilinishi talabalarning kasbiy kompetentligini shakllantirish, didaktik, kreativ, integrativ, ijodiy, kasbiy bilimlardan samarali foydalanish texnologiyalarini hayotga tatbiq etish bo‘yicha ilmiy tadqiqotlar olib borishni kun tartibiga qo‘ymoqda.

Dunyoda oliy ta’lim muassasalari talabalarining kasbiy kompetentligini shakllantirish borasida olib borilgan tadqiqotlar asosida kasbiy kompetentlikning mazmuni, tizimli tarzda tashkil etishning metodologik asoslarini takomillashtirish yuzasidan ilmiy izlanishlar olib borilmoqda. Shuningdek, kasbiy kompetentlikni takomillashtirish modellarining samaradorligini oshirish, innovatsion metodikalar hamda elektron ta’lim resurslari asosida tashkil etish bo‘yicha tadqiqotlar alohida ahamiyatga molik. Shu jihatdan bo‘lajak boshlang‘ich sinf o‘qituvchilarining kasbiy kompetentligini shakllantiruvchi ta’lim jarayonini tashkil etishga yo‘naltirilgan pedagogik imkoniyatlarni yaratish zaruriyatini izohlaydi.

Respublikamizda umumiy o‘rta ta’lim tizimi shakllanishining zamonaviy bosqichida strategik vazifalardan biri ommaviy boshlang‘ich ta’limning yangi shaxsga yo‘naltirilgan modelini yaratish hisoblanadi (talaba shaxsiga yondashuv asosidagi didaktik tizimlarning variativ dasturlari kiritiladi). Shu sababli zamonaviy dinamik o‘zgarib borayotgan maktab uchun kasbiy vazifalarni mustaqil va ijodiy hal etadigan; bilimlarni mustaqil egallaydigan, turli vaziyatlarda bilim va pedagogik ko‘nikmalarni integratsiyalay oluvchi, o‘z-o‘zini kasbiy takomillashtirishga tayyor kadrlar tayyorlashni taqozo etmoqda.

O‘zbekiston Respublikasi Prezidentining 2017-yil 7-fevraldagi PF 4947-sonli “O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida”, 2018-yil 25-yanvardagi “Umumiy o‘rta, o‘rta maxsus va kasb-hunar ta’limi tizimini tubdan takomillashtirish chora-tadbirlari to‘g‘risida” PF-5313-sonli Farmoni, 2018-yil 5-iyuldagi “Oliy ta’lim muassasalarida ta’lim sifatini oshirish va ularning mamlakatda amalga oshirilayotgan keng qamrovli islohotlarda faol ishtirokini ta’minlash bo‘yicha qo‘shimcha chora-tadbirlar to‘g‘risida” PQ-3775-sonli qarori, 2017-yil 20-apreldagi “Oliy ta’lim tizimini yanada rivojlantirish chora-tadbirlari to‘g‘risida” PQ-2909-sonli qarorlari hamda mazkur faoliyatga oid boshqa me’yoriy-huquqiy hujjatlarda belgilangan vazifalarni amalga oshirishda ushbu dissertatsiya ishi muayyan darajada xizmat qiladi.