Цзбекистон республикаси

7.2. Ўқув биносига қўйиладиган талаблар. Олий таълим муассасаларида ўтказиладиган техник лойиҳалаш ва моделлаштириш машғулотлари учун кўпинча ўқув устахоналаридан фойдаланилади. Бу устахоналарда меҳнат таълимининг ҳар хил ташкилий шакл ва методларидан фойдаланиш; техник маълумотлар бериш; тадқиқотчилик ва меҳнат малакаларини шакллантириш ишларининг амалга ошириш; техник билимларни меҳнат усулларини, бажарилган ишларни сифатини назорат қилиш; эстетик дид ва меҳнат маданияти кўникмаларини, мустақил ишлаш иқтидорини шакллантириш; конструкторлик-технологик характердаги ижодий масалаларни ҳал қилиш, юксак даражадаги меҳнат интизомига ва меҳнат муҳофазасига талабларига риоя этиш учун яхши шароитлар мавжуд бўлиши керак.
Юқорида айтилган вазифалардан келиб чиқиб ўқув устахоналари қуйидаги асосий санитария-гигиеник ва ташкилий-методик талабларга жавоб бериши лозим:

1. 
   Устахона биноси таълимий-педагогик, санитария-гигиеник ва ишлаб чиқариш-техник талабларни қаноатлантириши керак.
   
2. 
   Ўқув устахоналари техниканинг ҳозирги даражасига, юксак меҳнат маданиятига мувофиқ жиҳозланиши ва улар фақат устахона амалиёти дастуридаги барча мавзуларни эмас, балки техник ижодкорликни ҳам ўрганиш учун зарур шароит билан таъминланиши лозим.
   
3. 
   Турли буюртмаларни бажаришда педагогнинг ўрганувчилар билан олиб борадиган умумий группавий ҳамда бригада - звеноли ва потокли ишлари учун ҳам шароит яратилиши зарур.
   
4. 
   Ҳар бир талабага керакли асбоб-ускуналар ва мосламалар билан таъминланган алоҳида иш ўрни ажратилиши лозим.
   
5. 
   Педагог учун тегишли жиҳозлар, мосламалар билан таъминланган ва полдан 250-300 мм кўтарилган намунали иш ўрни ташкил этилиши лозим.
   
6. 
   Устахоналарда талабаларга энг қулай ва хавфсиз меҳнат қилиши учун зарур шароит бўлиши шарт.
   
7. 
   Ўқув устахоналари ҳажмли ва текис кўрсатмали қўлланмалар, шунингдек, таълимнинг техник воситалари билан жиҳозланиши зарур.
   
8. 
   Ёрдамчи бинолар (асбобхона ва склад) ўқув устахонасига яқин бўлиши керак.
   
9. 
   Ташқаридаги товушлар, талабаларнинг эътиборини ишдан чалғитадиган ва меҳнат жараёнига ҳалақит берадиган шовқин-суронлар устахонага кирмаслиги лозим.