Covid-19 билан касалланган ҳомиладорларни олиб бориш

COVID-19 шубҳали ёки тасдиқланган симптомсиз ёки енгил кечиши билан 22 ҳафталик муддатгача ҳомиладорлар изоляция қилиниш шарти билан уйда даволанишлари мумкин.

• Уйда ўз-ўзини изоляция қилишда бўлган ҳомиладорлар ва туққан аёлларга профилактика чораларини мустақил бажаришни тавсия этиш лозим.
• Тиббий муассасаларга режали туғруққача ва туғруқдан кейинги ташрифлар кечиктиришилиши керак. Туғруққача ва туғруқдан кейинги маслаҳатлар альтернатив платформада, яъни уйга ташриф, телефон орқали маслаҳат бериш ёки телемедицинанинг бошқа усулларини қўллаган ҳолда ўтказилиши лозим.
• Ҳомиладорликни тўхтатишга кўрсатма бўлганда ҳомиладорликнинг 12 ҳафтасигача муддатда медикаментоз аборт усулини қўллаш мақсадга мувофиқ бўлади.
• COVID-19 пандемияси шароитида ҳамроҳ туғруқлар масаласи даволаш муассасасининг кўрсатмасига асосан ҳал қилинади.
• Туғдириш усули индивидуал ҳолатда акушерлик кўрсатмалар ва аёлнинг ҳоҳиши бўйича аниқланади. COVID-19 мусбат ҳолати кесар кесиш учун кўрсатма бўлиб ҳисобланмайди.

Касаллик ўрта оғир ва оғир кечишида

• Ҳомиладорликнинг 12 ҳафтасигача муддатда вирусли инфекция ҳамда дори воситаларнинг эмбриотоксик таъсири билан боғлиқ перинатал асоратлар юқори бўлиши сабабли аёлга касалликдан соғайгандан сўнг ҳомиладорликни тўхтатишни тавсия этиш мумкин.
• Аёл ҳомиладорликни тўхтатишдан воз кечганда аёлнинг розилиги билан ҳомиладорликнинг 12-14 ҳафтасигача хорион ворсиналари ёки плацентани биопсия қилиш ёки 16 ҳафтадан сўнг амниоцентез қилиб, ҳомиладаги хромосом нуқсонларни аниқлаш мақсадга мувофиқ бўлади.
• Касаллик авж олган даврда ҳомиладорликни тўхтатиш ёки туғдириш оналар ўлими кўрсаткичининг ва асосий касаллик ва унинг асоратларининг оғирлашиши, нафас етишмовчилиги ривожланиши ва авж олиши, акушерлик асоратлари келиб чиқиши, ҳомиланинг интранатал нобуд бўлиши, чилла даври йирингли-септик асоратлар ривожланиши каби асоратлар сонининг ортишига олиб келади.
• Акушерлик тактика бир нечта аспектлар асосида аниқланади: аёл аҳволининг оғирлиги, гестация муддати, ҳомила ҳолати. Ҳамма ҳолатларда туғдириш вақти ва усули индивидуал ҳал қилинади.
• Шошилинч абдоминал туғдириш (кесарча кесиш) акушерлик коагулопатик ва гипотоник қон кетишларнинг олдини олган ҳолда ЎСВ/ИВЛ фонида гипоксияни бартараф этиш имкони бўлмаганда ёки нафас етишмовчилиги авж олганда, ўпкада альвеоляр шиш кузатилганда ҳамда рефрактер септик шокда она ва ҳомила ҳаётий кўрсатмалари асосида бажарилади. Бошқа ҳолатларда кесарча кесиш стандарт акушерлик кўрсатмалар асосида амалга оширилади.