Conference proceedings

Açar sözlər. 
Alternativ enerji, ənənəvi enerji, enerji mənbələri, təbii yanacaq, grid texnologiyaları, bərpa olunan enerji, ekoloji 
böhran. 
Keçən əsrdən başlayaraq təbii yanacağa olan tələbatın artması və onun istehsalında olan mürəkkəbləşmələrin 
nəticəsi kimi, enerji qiyməti də kəskin surətdə artmağa başlamışdır. Buna səbəb kəşf edilmiş yüksək keyfiyyətli "yüngül" 
neft ehtiyatlarının azalması, yeni yataqların işlənilməsinin çətinliyi və köhnə yataqların tükənməsidir. Bütün bunlar neft 
və onun emal məhsullarına artan təlabata görə karbohidrogen xammalının qiymətində qeyri-stabillik yaradır. Bu özünü 
xüsusilə də mədən kömürünün çıxarılma və daşınma qiymətlərində göstərir. Təbii ehtiyatların tükənmə səbəbi və bununla 
əlaqədar olaraq enerjinin qiymətinin artması, öz növbəsində yaranan iqtisadi böhranların enerji sektoruna təsirini qaçılmaz 
edir. Problem atmosferə “istixana qazı” СО2 tullanması ilə daha da mürəkkəbləşir ki, buda nəticədə havanın orta 
temperaturunun getdikcə yüksəlməsinə və qlobal iqlim dəyişməsinə səbəb olur. Belə ki, ədəbiyyat materiallarından 
məlum olduğu kimi “istixana qazı” СО2 -nin səviyyəsi uzun zaman ərzində 180 ppm - 290 ppm arasında dəyişdiyi halda, 
sənaye inqilabından sonra, yəni 65 ildən çox bir müddət ərzində onun atmosferdə miqdarı 300 ppm-dən 400 ppm-ə kimi 
yüksəlmişdir. 
Mədən yanacaqlarından istifadə nəticəsində ətraf mühit elementlərinin (hava, torpaq, suyu) çirklənməsi 
nəticəsində insanların sağlamlığına təhlükə yaradan, bitki və heyvanların məhv olmasına səbəb olan problemlər ətraf 
mühitin qorunmasına qarşı həssaslığı artırır. Digər tərəfdən isə sənayenin inkişaf etməsi ilə enerji tələbatının daha da 
artması, AEM-ə olan maraqları daha da artırır ki, buda alternativ “yaşıl” texnologiyaların tətbiq edilməsini və sənayenin 
yeni sahəsinin inkişafını stimullaşdırır.
Bəşəriyyət əgər bərpa olunan enerji mənbələrindən istifadə texnologiyasını mənimsəyərsə, bərpa olunan və 
olunmayan ehtiyatların istifadəsinin optimal uyğunluğunu taparsa, o enerji və ekoloji böhran təhlükəsi ilə rastlaşmayacaq. 
Enerji ehtiyatlarının tükənməsi və planetdə iqlimin qlobal pisləşməsi ilə əlaqədar yeni bərpa olunan bioparçalanan və 
karbon qazı ayırmayan enerji mənbələrinin yaradılması –müasir zamanın ən vacib məsələlərindəndir. 
AEM ölkənin coğrafi qurluşundan asılı olaraq ayrı-ayrı bölgələrində dağınıq formada olduğundan iqtisadi və 
sosial cəhətdən inkişaf etməmiş, sənaye inkişafının geri qaldığı bölgələrdə də tətbiq edilmə imkanı vardır. AEM-nin 
istifadəsi iqtisadi proqramların inkişafına, işsizliyin azalmasına şərait yaratmaqla rayonlar arasındakı inkişaf fərqlərinin 
aradan qalxmasına, iqtisadi və ictimai cəhətdən qeyri-tarazlığın azalmasına təsir edə bilər. Bütün bu amillər - enerji 
resurslarına tələbatın daim artması, ənənəvi enerji resurslarının məhdudluğu, karbohidrogen ehtiyatlardan istifadənin 
qlobal iqlim şəraitinə mənfi təsiri, ətraf mühitə qarşı həssaslığın artması dünyada alternativ və bərpa olunan enerji 
mənbələrindən (ABOEM) istifadənin zəruriliyini daha da artırmışdır. Enerjiyə qənaət edən resurslara yanacaq-enerji 
ehtiyatlarının səmərəli (rasional) istifadəsini (və qənaətli istehlakına) və bərpa olunan enerji mənbələrinin təsərrüfat 
dövriyyəsinə cəlb edilməsinə yönəldilmiş hüquqi, təşkilati, elmi, istehsalat-texniki, texnoloji və iqtisadi xarakterli 
tədbirləri aid etmək olar. Ümumilikdə götürdükdə alınan enerjinin səmərəli yollarla istehlakçılara ötürülmə məsələsinin 
həlli müasir dövrün aktual məsələlərindən birinə çevrilmişdir.
Yuxarıda sadaladığımız bütün məsələlərin həlli nöqteyi nəzərindən ABOEM–in hibrid istifadəsi, SCADA 
sistemlər və Smart Grid texnologiyalarının tətbiqi toxunulan problemin həllində öz köməklərini göstərə bilərlər. Ona görə 
də bu işdə günəş və külək enerjisi əsasında qurulmuş elektrik stansiyasının və enerjini min. itki ilə ötürən Smart Grid 
avadanlıqlarının vəhdətindən təşkil olunmuş hibrid sistemə baxılmışdır. Təqdim edilən dissertasiya problem yönümlü 
elmi tədqiqat işinin nəticələrini özündə əks etdirərək, yuxarıda göstərilən aktual məsələlərinin həllinə istiqamətlənmişdir. 
İşin məqsədi ABOEM-nin enerji potensiallarının araşdırılması, onlardan istifadə perspektivlərinin artırılması, 
ölkəmizdə bu mənbələrin enerji tutumunu nəzərə alaraq onlardan daha səmərəli istifadə etmək yollarını, bunun üçün tələb 
olanan avadanlıqların seçilməsini, bu avadanlıqlarla bağlı hesabatları və onlar arasındakı əlaqənin necə qurulacağını, 
hansı vasitələrlə ABOEM -dən alınan enerjinin tələbatçılara effektiv çatdırılma yollarının öyrənilməsidir.
Beynəlxalq Enerji Agentliyinin (BEA) hesabatlarında göstərdiyi kimi dünyada enerjinin istehlakı üç əsas sahəyə 
bölünür: bura nəqliyyat, isitmə/soyutma və elektrik enerjisi daxildir. Təbii yanacaq ehtiyatlarının tükənməsi, qlobal 
istiləşmə, karbon emissiyasının azaldılması və s. kimi səbəblərdən hər üç sektorda alternativ enerji mənbələrinin (AEM) 
tətbiqi getdikcə sürətlənir. Bunun təsdiqi kimi hal-hazırda dünyada olan AEM-in ümumi enerji tutumunu, son dövrlərdəki 
inkişafını və qoyulan investisiyaları nəzərdən keçirilməsi kifayətdir. Belə ki, BEA-nın araşdırmalarına görə 2015-ci ildə 
dünyada ümumi istehlak olunan enerjinin 48%-i isitmə və soyutmanın, 32%-i nəqliyyatın, 20%-i elektrik enerjisinin 
payına düşür ki, bunun da isitmə və soyutma üçün 27%-i, nəqliyyat üçün 3%-i, elektrik enerjisi üçün isə 25%-i (2017-ci 
ildə 26.5%-ə çatmışdır) bərpa olunan enerji (BOE) mənbələri tərəfindən qarşılanmışdır. 2017-ci ilin sonunda AEM-nin 
ümumi enerji tutumu 2195 GVt qiymətinə çatmışdır. 2007-2017-ci illərdə BOE tutumunun artım sürəti şək. 1-də 
göstərilmişdir. 
Quliyeva S.V., Abdullayev Ü.T., Balayev Ş.A. 

---

 
Şək. 1. 2007-2017-ci illərdə qlobal BOE tutumunun müqayi 
BOE tutumunda illik ən böyük artım 2017-ci ildə olmuş və 2016-cı ilə nisbətən 9% yüksəliş müşahidə edilmişdir. 
Ümumiyyətlə 2017-ci ildə enerji tutumu artımının 70%-i BOE mənbələri hesabına olmuşdur ki, bu da əsasən günəş və 
külək enerjisinin rəqabətyönümlü inkişafı hesabınadır. Artırılmış enerji tutumunun 55 %-i PV günəş panelləri hesabına 
əldə edilmişdir. BOE hesabına artan enerji tutumu təbii yanacaqlar və nüvə enerjisi hesabına artırılan enerji tutumundan 
daha çox olmuşdur. Külək enerjisi hesabına enerji tutumunun artımı 29%, hidroenerji hesabına isə enerji tutumunu artırmı 
11% -ə bərabər olmuşdur. AEM içərisində hidroenerji ən böyük enerji tutumuna malikdir və onun enerji tutumu bütün 
digər mənbələrin enerji tutumundan çoxdur. Hidroenerjidən sonra külək və günəş enerjisi daha çox tutum potensialına 
malikdir.
Dünya ölkələrinin AEM-nə qoyduqları investisiyaların araşdırmalarının nəticələri göstərir ki, 2017-ci ildə bərpa 
oluna bilən enerji və yanacaqlara (gücü 50 MVt-dan çox olan hidroelektrik stansiyaları istisna olmaqla) qoyulan 
investisiya 2016-cı ilə nisbətən 2% artaraq 279.8 milyard ABŞ dolları həcmində olmuş, lakin bu göstərici 2015-ci illə 
müqayisədə 13 % azalmışdır [29]. Demək olar ki, qoyulan investisiyanın əsas hissəsi günəş PV panellərinin (57%) və 
külək enerjisinin (38%) payına düşür. Texnologiyanın sürətlə inkişaf etdirilməsi sayəsində ildən-ilə tələb olunan 
investisiyalar azaldıqca BOE tutumu artmaqda davam edir. İnkişaf etməkdə olan ölkələrin qoyduqları investisiya inkişaf 
etmiş ölkələrin qoyduqları investisiyadan daha çoxdur (ümumi dəyərin 63%-i) və qlobal investisiyanın rekord hədd ilə 
45%-i, 126.6 milyard ABŞ dolları təkcə Çinin payına düşür, bu rəqəm 2016-cı ildə 36% təşkil edirdi. Sərmayenin 15%-i 
Avropa (40.9 milyard ABŞ dolları), 14%-i ABŞ, 11%-i Asiya dövlətləri (Çin və Hindistan xaric olmaqla) tərəfindən 
qoyulmuşdur. Daha az sərmaye isə 5% Amerika dövlətləri (Brazilya və ABŞ istisna olmaqla), 4% Hindistan, 4% Orta 
Şərq və Afrika və 2% Brazilya tərəfindən qoyulmuşdur. 2017-ci ildə Latın Amerikası və ABŞ-da qoyulan investisiya payı 
daha da artsada, Avropa ölkələrində bu qiymət 2010-cu ildən bəri getdikcə azalaraq 30%-ə düşmüşdür. Qoyduqları 
sərmayeyə görə ilk beşlikdə olan ölkələrə baxsaq bu sırada liderlik Çinə, digər yerlər isə uyğun olaraq ABŞ, Yaponiya, 
Hindistan və Almaniyaya məxsusdur. Bu dövlətlərin böyük investisiya qoymağının digər səbəbi isə təbii yanacaq 
ehtiyatının olmaması və tələb olunan enerji üçün xaricdən aslılığı aradan qaldırmaqdır.
Apardığımız araşdırmalardan alınan nəticələr aşağıdakılardır:
İşdə AEM mənbələrindən alınan enerjini istehlakçılara minimum itkilər və səmərəli üsullarla çatdırmaq üçün, 
problemi həll edə biləcək smart grid texnologiyalarının tətbiqi təklif olunmuşdur. Təklif oluan texnologiyalarda istifadə 
eilən avadanlıqlar sayəsində yuxarıda sadaladıqlarımızla yanaşı istehsal olunan enerjinin qiymətini aşağı salmaq, 
sistemdəki qəzaların sayını əhəmiyyətli dərəcədə azaltmaq mümükün olacaqdır.
Bərpa olunan enerjidən istifadəni daha da artırmaq və ənənəvi enerji stansiyalarından həmçinin təbii 
yanacaqlardan aslılığı aradan qaldırmaq üçün hibrid enerji sistemi təklif olunmuşdur. Bu sistemlərin tətbiqi nəticəsində 
ekoloji probləmlərin, qlobal istiləşmənin ən əsası isə təbii yanacaqlardan aslılığın aradan qaldırılmasına şərait yaratmaq 
olar.