Choriyev Anvar

Manbalarni turkumlash. Bugunda sharq yozma manbalarni turkumlashning yagona aniq bir qoidasi hozirgacha ishlab chiqilmagan. Mavjud qo’lyozma manbalar fihristi bir qismi asarlar tili nuqtai nazaridan kelib chiqib tuzilgan. Masalan, Angliyaning Britaniya muzeyida saqlanayotgan sharq qo’lyozmalari yirik sharqshunos Charlz Riyo tomonidan ularning qaysi tilda yozilganiga qarab, arab, fors va turkiy tildagi qo’lyozmalarni alohida, alohida tavsifga olib fihrist tuzgan. Fransiya poytaxti Parijdagi Milliy kutubxonadagi saqlanayotgan sharq qo’lyozmalari haqida Edgar Bloshe ham shu tartibda katalog tuzgan.
Toshkentdagi Abu Rayhon Beruniy nomidagi Sharqshunoslik instituti xazinasidagi qo’yozmalar birinchi bor saqlanayotgan tashkilot “O’zbekiston Fanlar Akademiyasi Sharq qo’lyozmalari majmuasi” nomi ostida turli tildagi va turli mavzudagi asarlar tavsifga olinib, ularning o’n bir jildda nashr etilgan. Hozir qo’lyozmalarni qaysi fan sohasiga oidligiga qarab tavsifga olish boshlab yuborilgan mana shunday kataloglar chop etilmoqda.
Ba’zi manbashunoslar qo’lyozmalarni mazmuniga qarab, asarda qaysi masala bayon etilganiga qarab, turkumlashni lozim topsalar, ularning boshqa bir guruhi asarning kelib chiqishiga, ya’ni qayerda va qachon yozilganligiga qarab turkumlashni ma’qul ko’radilar.
Yana bir guruh olimlar esa ularni rasmiy hujjatlar, tarixiy, geo-kosmografik va biografik asarlar kabi turlarga bo’lib o’rganishni tavsiya qiladilar. Manbalarni avtograf – ya’ni muallifning o’z qo’li bilan ekanligiga qarab yoki ko’chirilgan nusxa ekanligigi qarab turkumlash hollari ham uchraydi.
Hozirgi paytda tarixchi manbashunoslar manbalar ustida ishlashning faqat bittasiga, ya’ni ularning turlariga qarab tadqiq etishni maqsadga muvofiq deb hisoblaydilar. Chunki boshqa tadqiqot yo’llari yozma manbani chuqur va atroflicha o’rganish hamda tahlil qilish vazifalariga to’la javob bera olmaydi.
Birinchidan, tarixiy manbalar ichida faqat bir masala – ijtimoiy-iqtisodiy, siyosiy, madaniy va boshqaga butunlay bag’ishlangan asar deyarli yo’q yoki juda kam.
Til bo’yicha manbalarni o’rganish yomon emas, lekin biror mavzuga oid manbalarni o’rganganda, faqat bir yoki ikki tilda yaratilgan asarlar bilan chegaralanish tadqiqot ilmiy qiymatini pasaytiradi.
Mana shularni inobatga olganda, tarixiy manbalarni turlariga va qaysi davr voqealarini aks ettirganligiga qarab turkumlash maqsadga muvofiqdir. Avvalgi paytlarda talaygina markaziy oliy o’quv yurtlarida o’qitilgan “SSR tarixi manbashunosligi” va “O’rta asrlar tarixi manbashunosligi” darsliklari mana shu qoidaga asoslangan.
B.A.Ahmedov “O’zbekiston tarixi (o’rta asrlar) manbalari”ni (yozma manbalarni) quyidagi uch turga bo’lib o’rganishni tavsiya qilgan: 1) Ashyoviy manbalar, ya’ni arxeologik qazishlar natijasida topilgan ashyolar; 2) rasmiy hujjatlar; 3) tarixiy, geo-kosmografik hamda biografik asarlar¹. Ushbu turkumda qayd etilgan arxeologik yoki ashyoviy manbalar, ya’ni qadimda ajdodlarimiz turmush tarzi va ijtimoiy faoliyatini o’rganish uchun asosiy manba bo’lib xizmat qiluvchi manbalar asosan arxeologiya fani tomonidan o’rganiladi va biz uchun qo’shimcha yoki yordamchi dalil sifatida tadqiqotlarga jalb etilishi mumkin.
Bizning fikrimizcha, O’zbekiston tarixi yozma manbalarini asasan ikki turga bo’lib o’rganish ma’qul ko’rinadi.